EDITORYAL - Way pagpakabana

Nagsugod na ang pagsige  og bunok sa uwan bisan wala pay pormal nga pahibawo ang Pagasa nga nisud na ang ting-uwan.

 Apan ang gobiyerno naghimo na og mga lakang alang sa pagpangandam sama sa information drives ug subling pagpahimangno sa mga tawo bahin sa mga danger zones diha sa ilang mga dapit  aron mamenus ang mga disgrasya o kinabuhing makalas.

Bisan pagtuman sa mga simple nga environmental laws sama na lang sa hustong pagbahig sa basura ug dili pagpataka og labay og basura angay unta batasanon. Naobserbahan nga sa pag-abot na gani sa mga kalihokan sa pangkalikopan wala kaayoy gana ang mga  tawo pagsalmot o bisan pagpakabana na lang pinaagi sa partisipasyon.

Apan kun adunay mga katalagman nga mahitabo, pagbaha, landslides, sunog o pagnihit sa mga gikinahanglan sama sa bugas, utanon, isda, karne ug uban pa daghang yawit ang mga tawo batok sa gobiyerno.

Kadto untang wala’y pagpakabana andam pud unta kanunay sa mga mahitabo   kanila ug sa ilang pamilya. Angay silang mauwaw ug dili na moyangungo pa sa gobiyerno o mobasol sa uban sa ilang dangatan.

Gawas sa ting-uwan, gipaabot usab ang pagsud sa La Niña nga magdala usab og daghang pagbunok og uwan nga dili normal ang gidaghanon ug sa tayming, butang nga angayang pangandaman sa tanan.

Usa kini karon ka dakong hagit sa mosunod nga mga lider sa nasud pinangulohan ni presumptive president Rodrigo Duterte, ang hagit sa kinaiyahan nga bisan kadtong mga  dagkong nasud sama sa Amerika nakasinati og grabeng kadaot tungod  niini.

 Atol sa kampanya  wa kaayoy maayong gibungat si Duterte bahin sa programa sa pangkalikopan, usa sa mga nakita sa mga environmentalists nga kakulang sa "macho" nga imaheng gipakita sa umaabot nga lider sa nasud.

Hagit karon kang Duterte ang kinaiya sa mga tawo nga way pagpakabana sa kalikopan.