Ang suwat nga gihigdaan ni San Jose
Nahimong popular karon ang sleeping Saint Joseph. Gani ako duna may imahen niini apan akong gihatag sa akong higala ingon nga akong gasa kaniya sa dihang niadto ko sa Tagaytay. Sa akong paghatag niya sa maong imahen iya kong gipangutana: “Madungog ba kaha ko niya ingon man ang akong mga pangilaba ug mahatud ngadto sa Dios ang akong mga kahingawa nga nahikatulog man siya Padre?” wala dayon ko motingog. Apan ako siyang gisumbalik: “ngano man diay og nahikatulog si San Jose nagpasabot ba diay kini og kawalay pagpakabana?” Ang Dios nipadayag sa iyang kaugalingon diha sa damgo ni San Jose. Ug gani ang Jose sa karaang tugon gitawag man nga Joseph the Dreamer. Pabiling aktibo si San Jose bisan pa man sa iyang paghikatulog. Ug aduna koy higala nga nahimo niyang batasan nga iyang isukip ilawom sa imahen nga naghigda ang suwat hangyo sa iyang mga panginahanglan, kahingawa ug kabalaka. Timaan kini sa iyang dakong pagtuo sama sa usa ka bata nga ang Dios mosanong sa iyang mga kinahanglanon pinaagi sa pangama ni San Jose. Dili kini mahitungod sa suwat o sa imahen lamang kun dili duna kini dakong kalambigitan sa atong pagtuo nga ang Dios mohatag sa atong mga panginahanglan ingon maminaw sa atong mga yangungo ug mga pangindahay.
- Latest