EDITORYAL - Bawos-bawos lang

Ang presidente sa Association of Barangay Councils (ABC) sa dakbayan sa Sugbo mitug-an nga siya ug ang ubang mga opisyal sa barangay dili motuman sa mando nga iuli nila ang sakyanan nga giisyu kanila gikan sa City Hall.

Ang rason nila ni Tisa Barangay Captain Philip Zafra mao nga ang maong mga sakyanan gigamit nila ug apektado ang pagserbisyo nila sa katawhan kun ilang tumanon ang kamandoan ni Acting Cebu City Mayor Margot Osmeña.

Angay’ng hinumdoman ni Zafra nga nakahuman siya sa kurso pagka abogado ug tingali wala siya makalimot sa lagda nga gilatid sa Article 217 sa Revised Penal Code.

Gilatid sa maong balaod nga “The failure of a public officer to have duly forthcoming any public funds or property with which he is chargeable, upon demand by any duly authorized officer, shall be prima facie evidence that he has put such missing funds or property to personal use.”

Dili angay’ng mahadlok si Kapitan Zafra ug kaubang mga kapitan tungod kay ibalik ra man kanila ang maong mga sakyanan human kahimoi og imbentaryo.

Ang angay’ng mahadlok sa pag-turn over sa mga butang nga iya sa kagamhanan sa dakbayan mao kadtong mga tawo nga giisyuhan niini tungod lang kay suod sila ni suspended Mayor Michael Rama.

Angay pa gani unta nga si Kapitan Zafra, isip pangulo sa kahugpongan sa mga barangay kapitan dinhi sa dakbayan, nangabogar unta ni Mayor Rama kaniadto nga dili ipamolitika ang sakyanan.

Ang gihimo ni Mayor Rama mao nga kadtong mga kapitan sa barangay nga dili iyang kaalyado, wala tugyani sa mga sakyanan ug didto kini gitugyan sa mga konsehal nga iyang alalay.

Tingali kini maoy ilang gikahadlokan nga silang mga kapitan nga alyado sa Team Rama mao na usab ang maigo sa binuhatan sa kanhi administrasyon.