Asa mokuha og marriage license?

Dear Atty. Divine,

Duna ko’y pangutana labot sa among plano nga magpakasal. Nagpuyo na mi sa akong partner karon sud na sa pito ka tuig ug duna mi duha ka anak. Karong bag-o, ang akong bana na-diagnosed nga adunay prostate cancer. Pagkakaron nagpadayon pa ang iyang treatment ug naglaum ko nga maulian unta siya sa maong sakit. Plano unta namo nga magpakasal attorney apan wa ko masayod kun unsa’y una namo nga buhaton aron among mapahigayon ang pagpakasal sa simbahan. Gusto man gud sa akong bana nga ma-legitimated ang among mga anak, ilabi na kay nagsugod na sila karon sa pag-eskwela. Matud sa akong amiga nga magkinahanglan kami og marriage license kun kami magpakasal sa simbahan. Asa man kami mokuha og marriage license? Unsa may mga requirements o dokumento nga angayan namo nga andamon? - Nora

Dear Nora,

Kanang Marriage License requirement kana alang sa gustong magpakasal whether Civil wedding or church wedding. Adto kana kuhaon sa Local Civil Registrar diin kamo nagpuyo. Ang usa sa mga rekisitos niana mao ang NSO Birth Certificate ninyong duha ug ang Certificate of No Marriage or Cenomar ug kinahanglan sab kamo nga motambong sa seminar nga pasiugdahan sa Local Civil Registrar. Apan kun naglive-in na kamo sud sa kapin sa lima ka tuig, then mahimo kamong exempted sa pagkuha og marriage license ug ang inyong buhaton mao lang ang pagpahimo og Joint Affidavit of Cohabitation nga notarized sa abogado ug pirmado ninyong duha. Kun sa simbahan mo magpakasal mas maayo nga moadto ka sa simbahan aron mangayo og listahan sa mga rekisitos nga angayan ninyong isumiter kanila alang sa inyong tinguha nga magpakasal. Inyong sultian ang simbahan nga naglive-in na kamo sud sa pito ka tuig sa imong partner aron di na kamo pangayoan og marriage licence apan kinahanglan gyud kamo nga mo-submit og Joint Affidavit of Cohabitation. — Atty Divine