EDITORYAL - Ang eleksyon lumalabay lamang

Karong adlaw nga Lunes Mayo 9 hukman na sa katawhan kining mga nangambisyon og posisyon sa gobiyerno pinaagi sa bugnong lugaynon.

Na-obserbahan nga kini nga eleksyon nakapabahin-bahin og maayo sa katawhan.  Tungod sa nagkadaiyang mga rason maong aduna silay nagkadaiyang gipili ug gipaluyohang mga kandidato.

Siguro ang uban nipili og kandidato base sa ilang personal nga kasinatian, adunay uban nga nakuwangan sa labok sa kasamtangang administrasyon ug aduna say uban, di kini ikalimod, nagsakay-sakay lang sa panahon.

Apan makita diha sa social media nga nakaapektar gyud og dako sa kinabuhi sa mga Pilipino kining umaabot nga eleksyon karong Lunes.

Aduna nay managhigala nga nanag-away tungod sa managlahi nila og gipiling kandidato nga sa ilang tan-aw maoy ligdong, tarong ug magdala sa nasud sa kalamboan nga gipangita sa kadaghanan.

Bisan ang Simbahan sa sayo pa miingon nga nabahin-bahin niining eleksyona ang katawhang Pilipino, gani aduna pay mga pamilya nga nagkabikil tungod lamang niini.

Nakalimtan na ang maayong pamatasan, tawhanong pakiglambigit sa uban ug labaw sa tanan ang paglimot na lang sa naandan sa kadaghanan.

Unta nga human niini, magkauliay gihapon kining mga nagkasungi nga katawhan kay sa pagkatinuod, kining mga kandidato wala kini makaila personal niining mga supporters nga makigpatay alang kanila.

Dili man kining kandidatong gipaluyohan maoy motunol og asin o ba kaha motabang kun ang imong balay masunog dili ba? Kung masakit ang imong anak dili man ang kandidato maoy una nimo sangpiton.

Angay timan-an sa tanan, ang eleksyon lumalabay lamang, dili tanang panahon makiglantugi lang sa politika, kay ini og lingkod na sa mga nakadaog sa eleksyon, mobalik sa naandang pagpuyo ang katawhan.