Ang pagkontrol sa bloodsugar (2)

Sama sa nahisgutan nato sa niaging lindog, ang usa sa maayo nga maseguro ang pagkontrol sa ‘bloodsugar’, mukaon ta kanunay sa pamahaw, nga sa mga pagkaon, mao say palabihon ang mga prutas, utanon, lagutmon, mani, isda, manok ug ayaw anang mga ‘red meat’  sama sa karneng baboy, aron dili kita maantimano sa sakit sa diabetes-2. Hinuon naa ra gyud kini sa hustong ‘lifestyle’ sa pagkaon ug aktibo sa kalihokan nga pisikal ug sosyal nga ehersisyo.

Ang ehersisyo nga paglakaw kanunay, sagad himuon 30 mins o 5 ka kms kada adlaw sud sa 5 ka adlaw sa semana. Karon, kabahin ining matang sa ehersisyo, angay sab buhaton, nga kada 20 mins sa paglingkod, mobarog gyud ug molakaw-lakaw sa palibot sud sa 2 ka minutos. Bag-ong diskubre kini segun sa mga pagtuon didto sa England. Kay matud pa ang paglihok o paglakaw-lakaw, makapaubos kini sa lebel sa ‘bloodsugar’, aron kini magamit nga inerhiya.

Ang kompleto ining mga pagsulay, aron malikayan ang mga risgo nga kita ma-diabetes, bisitahe o i-google sa internet ang diabetes.org.

Unya, human mo nasabtan ang tanan, pakig-storya sa imong doktor, alang sa maayong resulta ug dugang katin-awan. Kini ang tambag ni Robert Ratner, MD, Chief Scientific & Medical Officer sa American Diabetes Association. Niya pa, maayo nga kanunay nimo imonitor ang lebel sa imong ‘bloodsugar’,  aron may giya ka unsay buhaton. Dugang pa niya, ang mga tambal nga druga nga gipanginom, sama sa ‘steroid’ nga pagpahupay o pakalma sa hubak, tambal sa kolesterol, sa hayblad, pulos kini maka-trigger sa pagpataas sa ‘bloodsugar’. Ang mga komplikasyon niini, maoy makadugang sa grabe unya nga pag-antus sa kadaut sa panglawas nato.

Busa istriktoha ang kaugalingon sa pagpakabana, nga masunod gayud nato ang mga tambag sa mga eksperto sa panglawas, ilabi na na sa atong doktor.