Sumosunod ni Hitler

Usa sa labing bangis nga diktador sa kasaysayan, si Adolf Hitler, pangu sa Nazi Party sa Germany, giila nga usa sa labing takos nga propagandista sa iyang panahon. Maong nilampos pagkuha sa suporta sa iyang katawhan, nga human nipahimutang niya sa gahom nitugot sa way kukaluoy’ng pag-ihaw sa inosenteng mga biktima sa nagkalainlaing kanasuran.

Niang kabahin sa 17 milyones nga iyang napatay: Unom ka milyon ka Hudeyo; kapin sa duha ka milyon ka piniriso sa gubat sa Unyong Sobyet; kapin sa duha ka milyon ka sibilyan sa Unyong Sobyet; kapin sa milyon ka sibilyan sa Poland; kapin sa milyon ka sibilyan sa Yugoslavia; 70,000 ka lalaki, babaye ug bata nga may kakulian sa panglawas ug panghunahuna; kapin sa 200,000 ka gipsies gikan sa Romania; ug wa matinong gidaghanon sa politikanhong mga piniriso, rebelde, bayot ug tomboy ug dayo.

* * *

Gipasabot ni Hitler ang iyang panglantaw sa propaganda sa iyang librong Mein Kampf (Akong Pakigbisog):

“Ang propaganda kinahanglang itumong sa kinabag-an sa katawhan. Kinahanglang ipresentar sa labing madanihong paagi ug sa ang-ang nga masabtan nila. Ang arte sa propaganda kinahanglang makapukaw sa panghunahuna sa publiko pinaagi sa pag-apelar sa ilang mga pagbati ug mangita sa tukmang bayhon nga makadani sa atensiyon ug makahikap sa kasingkasing sa masa.

Ang kinabag-an sa katawhan di makinaadmanon ug di makaumol sa ilang kaugalingong baruganan, maglubay-lubay sila nga morang mga bata nga kanunay’ng matabok-tabok gikan sa usa ka ideya ngadto sa lain. Ang kinabag-an binabaye og batasan nga ang ilang panghunahuna gigawongan sa sentimento inay sa kalma nga panghunahuna. Ang ilang sentimento di komplikado apan yano ug makanunayon nga mabahig lang sa negatibo ug positibo nga panghunahuna sa gugma ug kasilag, sakto ug sayop ug kamatuoran ug bakak.”

* * *

Unsay iyang sugyot sa epektibong propaganda?

“Ang propaganda di kinahanglan nga mosusi sa kamatuoran, labi na kun modapig sa pikas, kinahanglan nga motuki lang sa bahin sa kamatuoran nga pabor sa propagandista. Ang gahom sa pagsabot sa masa daginuton. Sa pikas nga bahin, dali silang makalimot. Tungod ini, ang tanang epektibong propaganda kinahanglang itingob sa pipila lang ka mahinungdanong detalye ug balikbalikon isip slogans hangtod nga ang labing ubos nga sakop sa populasyon makasabot sa ideya nga giduso.

“Ang matag kausaban sa mensahe kinahanglan nga sa tanang higayon motumbok sa samang tumong. Ang nag-unang slogan angay’ng ihulagway sa daghang paagi ug gikan sa nagkalainlaing anggulo, apan sa kataposan kinahanglan nga mobalik sa pagduso sa samang mensahe.”

* * *

Kinsa sa mga nagpapili ang nisunod sa giya ni Hitler? Kinsa nila ang, sama ni Hitler, gibugoan sa katawhan? Ug labaw sa tanan, kinsa nila, nga bisan sa bag-ong teknolohiya sa komunikasyon ug kaabunda sa kasayuran, nagmalampuson?

[email protected].