Worst nightmare!

Moabot na gyud ang adlaw sa paghukom, dili alang sa mga kandidato, kun dili, alang kanato nga katawhang Pilipinhon ug kita ang mahimong huwes nga modesisyon sa atong kaugmaon.

Sama ra sa moapil kita og final examination diin mahiapil ang ngalan sa mga kandidato sa multiple choice sa mga tubag nga atong pilian. Kun masipyat ang mga botante sa pagtubag sa test paper, sigurado nga bagsak gyud ang iyang padulngan.

Ingon niini ang mahitabo kun ang mga botante wala makaseguro kinsa ang iyang pilion kay lagi nisabay lang siya kun si kinsa ang trending ug wala na maghunahuna sa mahimo nga sangpotan sa higayon nga siya masipyat.

Dili sama sa eskwelahan nga kun mabagsak, mahimo ra nga mo-take og removal exam o kaha mo-enroll sa sunod semester. Kun masipyat kita sa eleksyon, mohulat pa kita og unom ka tuig ug diha pa kita makabawi, kun makabawi man ugaling.

Apan unsay mahitabo kun ang makalingkod sa gahum mogamot na sa pwesto kay gitinuod niini ang bahad nga wagtangon ang kongreso ug usbon ang sistema sa panggobiyerno?

Napul-an na ang tanan sa naandan nga sistema, ilabi na sa naghitak nga kurapsyon hinungdan nga nagpanikad na nga makaangkon sa hinanali nga kausaban.

Apan hinay-hinay lang kay basin ang gihandum nga "change for the best” mahimo na hinuon nga “change for the worst nightmare." Dili na ra ba ikabalik ang panahon.

Sa Lunes pa ang final exam sa mga botante ug aduna pay igo nga panahon sa pag-review sa konsensiya kun unsa ang mahimo nga final answer nga isulat sa balota.

Hinuon wala’y magbuot kanato kun si kinsa man ang atong pilion sa umaabot nga eleksyon. After all, kita ra man ang mabulahan o mabutang sa kaalautan sa makab-ot nato nga hukom sa eleksyon karong Mayo 9.

Sa pikas bahin diay, kinahanglan mopahimangno ang PAGASA nga makasinati og grabe nga kainit sa panahon sa election day, busa kinahanglang mosayo og botar ang katawhan, ilabi na kadtong mga adunay kakulian sa lawas, labaw sa tanan moinom og daghan tubig. Magkita-kita ta sa Election 2016, God bless the Philippines!