EDITORYAL - Angay tubagon ni Duterte

Sa ngalan sa 'transparency' ug kaangayan wala man siguroy mawagtang ni Davao City mayor Rodrigo Duterte kun iyahang buksan ang iyang bank accounts sa Bank of the Philippine Islands nga mao karoy hagit kaniya ni Senador Antonio Trillanes.

Dili man kini maingon ani kun sa sinugdanan pa lang sa wala pa siya opisyal nga nilansar pagka-presidente sa nasud iyaha nang gideklarar sa iyang statement of assets, liabilities and networth (SALN) nga gikwestyon karon ang maong mga bank accounts nga adunay P2.4 Bilyones.  Si Duterte ug iyang mga political backers mituboy kaniya isip bag-ong brand, usa ka matang sa kandidato nga wala sa uban nga sa tan-aw sa mga tawo makahaw-as sa ilang kapobrehon kun mahanaw ang tanang drug lords ug kriminalidad.

 Bag-o, maisugon ug wala’y kurapsyon nga lider ang tan-aw kaniya bisan og tinamban ug bahala na kun unsaon niya pagpaagi ang pagdala sa nasud.

Bisan tuod og may bulok pamolitika ang gihimo ni Trillanes dili mahimong isalikway lang sa daplin ang iyang pamahayag.  

Si Trillanes mao karoy nahimong suwab sa bangkaw sa mga anti-Duterte kay nabalaka silang mosamot og kagubot ang nasud kun kini makadaog.

Mas maayong seryosuhon  ni Duterte ang hagit kay makapalimpyo man kini sa iyang pangalan ug hangupon pa siya og maayo sa iyang mga dumadapig ug makombinsir kadtong namili pa kinsay suportahan.

Naka-komplikar niini mao ang pagusab-usab sa pamahayag ni Duterte bahin sa maong mga bank accounts, nga una niyang gihimakak dayon iyaha na usab giangkon. Hasta ang dollar accounts nga gipublikar ni Trillanes ning bag-o nga iya sab gihimakak giangkon na karon ni Duterte.

Importante kaayo sa mga supporters ni Duterte nga nituo sa mga propaganda nga wala siya’y kuwarta ug makinarya aron banggaon ang mga kaatbang.

Mas mosikat pa gani siya kun mapamatud-ang gikan sa mga yanong mga Pilipino nga nag amot-amot alang sa iyang kampanya ang maong salapi ug di gikan sa mga dagkong kompanya , mga personalidad o organisasyon nga adunay interes sa gahom.