Papirmahon na sa Deed of Absolute Sale

Dear Atty. Divine,

Ang akong amahan adunay nasunod nga yuta sa ilang ginikanan. Lima sila ka magsuon ang magbahin niini. Nahimutang sa commercial area ang maong yuta, busa medyo taas ang market value niini.

Karong bag-o, nakadawat og suwat ang akong amahan, lakip ang iyang mga igsuon kay adunay negosyante nga gustong mopalit sa property. Gisukip nila sa maong suwat ang kopya sa Deed of Absolute Sale nga gusto nilang papirmahan sa akong papa ug sa iyang mga igsuon.

Ang akong pangutana, angayan ba sila nga mopirma sa maong Deed of Absolute Sale nga wa pa man sila magkasabot sa prisyo? Unsa may angayang buhaton sa akong papa ug sa iyang mga igsuon kay gusto man sab nila nga ibaligya ang maong property? Daghang salamat.  — Ricky

Dear Ricky,

Dili pa angayan nga mopirma ang imong papa ug ang iyang mga igsuon sa maong Deed of Absolute Sale kay wa pa man sila magkasinabot sa buyer. Ang una nilang buhaton karon mao ang pagpakigkita sa negosyante nga gustong mopalit sa property ug ilang sultian ang buyer kun pila ang presyo sa maong property.

Kun mouyon ang buyer sa ilang prisyo, then isunod ang pag-andam sa mga dokumento nga pirmahan ug dayon magkita sila pag-usab alang sa pagbinayranay na ug pagpirmahanay sa dokumento. Mas maayo nga magdungan gyud ang pagbayad sa property ug ang pagpirma sa imong papa ug sa iyang mga igsuon sa Deed of Absolute Sale aron patas.

Kun mabayran na ang imong papa ug iyang mga igsuon, itugyan nila sa buyer ang titulo ug ubang dukomento nga may kalabutan sa property nga gipalit. Thanks and God Bless. - Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.