EDITORYAL - Natintal diay

Daghang opisyal sa kabarangayan ang mitalikod sa politikanhong grupo nga ilang gipasilongan sulod sa dugay’ng katuigan ug nakatabang kanila nga niabot sila sa ila karong mga pwesto.

Gihimo kining basehanan sa maong politikanhong grupo nga lig-on na sila kaayo kay anaa na man kanila ang hapit tanang kapitan ug ang kinabag-ang konsehal sa kabarangayan.

Sibaw hinuon kaayo ang mga huhungihong nga ang maong mga opisyal sa barangay natintal lang gyud sa dagkong kantidad nga gihaylo kanila aron biyaan ang ilang grupo.

Gawas sa gitanyag nga dakong kantidad nga magsilbe nga “acceptance fee,” giingon nga ang maong mga opisyal nga alyado sa maong politikanhong grupo hatagan pa gyud “sinemana.”

Busog tuod ang bulsa niining maong mga opisyal sa kabarangayan, apan mahimong ubos kaayo ang pagtan-aw kanila sa mga tawo nga nasayod sa tinuoray’ng rason sa ilang pagtapon sa pikas nga grupo.

Apil sa mibali sa iyang suporta mao ang opisyal sa barangay nga kaniadto mao gani ang nangulo pagpapirma og petisyon nga nag-awhag sa ilang lider nga dili padaganon pagka mayor ang opisyal nga iya na karong giyukboan.

Husto ang gihimo sa opisyal sa usa ka dakbayan nga sa wala pa siya mobiya sa gipasilongan niyang politikanhong grupo, nangunsulta usa siya sa iyang katagilumolupyo ug gipahibalo niya sa iyang plano nga pagbiya.

Gipasabot sa opisyal ang iyang katagilumolupyo nga ang iyang pagbiya sa politikanhong grupo nga gipasilongan niya dihang mipapili siya sa iyang katungdanan, adunay igo nga rason ug wala siya bayari og kuwarta sa grupo nga iyang balhinan.

Walay nagpugong sa usa ka politiko kun mobalhin siya sa iyang suporta, apan ngil-ad kaayo huna-hunaon nga ang iyang pagbalhin naggumikan sa kuwarta.