Berdugo sa tago

Sa labing unang higayon nga gipasanginlan ni Senador Antonio Trillanes IV og kahiwian si Bise Presidente Jejomar Binay, way nituo niya. Gihulagway siyang Binay nga bakakon. Bisan ang mga kaatbang ni Binay nagduda nga nagpatagad lang si Trillanes. Apan nakapakita og mga saksi ug mga ebidensiya si Trillanes pagdason sa iyang mga pasangil.

Labihan kadaghan sa iyang mga saksi ug mga ebidensiya nga nilungtad og kapin sa tuig ang imbestigasyon sa Senate Blue Ribbon subcommittee batok ni Binay ug mga sakop sa iyang pamilya. Ang paglikay ni Binay sa imbestigasyon ug pagsumbalik nga pamolitika ang pasangil batok niya nakapalig-on sa mga pagduda sa iyang kaligdong ug nakapatibugsok sa iyang ratings.

*  * *

Sa unang hisgot ni Trillanes sa bank accounts ni Davao City Mayor Rodrigo Duterte, bisan nakapakita na sa iyang labok batok ni Binay, way nihatag og seryusong pagtagad. Gihulagway siya sa tigpamaba ni Duterte nga bakakon kay way account ang mayor sa Bank of the Philippine Islands (BPI) sa Julia Vargas Avenue sa Pasig City.

Apan nakapakita si Trillanes og mga ebidensiya. Nga gidasonan sa mga sakop sa media ug nagpakabana nga mga magbubuhis nga naglumba paghimo og gagmay’ng  deposito sa gipanghimakak nga account. Way laing nahimo si Duterte gawas sa pag-angkon nga iya ang bank account ug pag-usab-usab sa banabana sa sud nga kuwarta.

* * *

Si Duterte wa dayon modason sa mga pasangil sa kahiwian batok ni Binay. Gani, dihang gipasakaan siya og disqualification cases niadtong Disyembre, nihulga nga kun di makadagan pagka presidente mangampanya siya parang Binay. Sa presidential debate dinhi sa Sugbo, gihulagway pa ganing Duterte si Binay nga mas “qualified” kay niya.

Apan dihang gitawag siyang Binay nga berdugo, gigamit ni Duterte ang expose ni Trillanes ug gisumbalik paghulagway si Binay nga berdugo sa kawat sa Makati. Dihang gitawag siyang Binay nga manyak ug abnormal tungod sa pagbugalbugal sa gilugos ug namatay’ng Australian missionary, gitawag ni Duterte si Binay nga certified plunderer.

* * *

Sa ato pa, hingpit nga gidasonan ni Duterte ang mga pasangil ni Trillanes batok ni Binay sa way pagsusi diin gikan ang mga ebidensiya, giunsa pagkuha ni Trillanes ang iyang mga dokumento, wa ba malapas ang katungod ni Binay sa bank secrecy law ug kun nakapirma ba si Trillanes og affidavit nga may notaryo pag-pormalisar sa mga pasangil.

Apan karong siya nay gipasanginlan ni Trillanes ug bisan nakapasalig nang ablihan ang iyang bank accounts, niinsistir na sa katungod pagpabiling pribado sa iyang bank accounts, giawhag ganing Bangko Sentral ng Pilipinas (BSP) ug Anti-Money Laundering Council (AMLC) pagpasabot nganong nalilian ni Trillanes ang iyang bank accounts ug, bisan nakapirma na og affidavit si Trillanes, nagdumili gihapon pagpakita pilay iyang kuwarta sa bangko.

[email protected]