Hinoktuki ang imong kasiguroan

Karong Lunes sunod semana, mopakanaug na kita sa atong hukom kun kinsa ang atong palingkoron sa Malakanyang isip presidente sa nasud.

Ako nanghinaot nga nakahukom na kamo ug ang pagsulat na lang sa balota ang inyong gipaabot. Hinaot pud unta nga ang inyong nahimong hukom gibase kini ninyo sa daghang konsiderasyon.

Ang pagpili og mga opisyal, ilabi na sa atong sangonan sa pagdumala sa renda sa kagamhanan sa nasud ug sa mga lokal nga kagamhanan, mahinungdanon kaayo kini kanato mao nga dili gayud kini nato komedyahan ug yama-yamaan lang.

Sa pagpili, gitan-aw unta nato ang lig-on ug konkreto nga programa nga mahimong makab-ot ug dili kadtong huyang ug imposibleng maabot.

Si Rodrigo Duterte sikat sa mga survey pero sa tanang mga presidentiables siya ang adunay labing imposible nga patakaran ug programa nga ipatuman nga sa akong tan-aw makapasubo lang kaniya.  Sama sa hisgotan ang foreign policy. Gusto ni Duterte nga putlon ang relasyon sa Amerika ug Australia human siya sawaya tungod sa iyang pagbugalbugal sa Australiana nga gilugos sa Davao.

Nalimot si Duterte nga ang Pilipinas usa sa labing huyang og depensa nga militar sa mga silingan niining kanasuran. Mao gani kini ang hinungdan ngano nga ang nangaging presidente misugot lang nga adunay mga Filipina nga gilugos sa mga Amerikano ug wala lang nila putla ang atong pagkahigala nila. Kun atakihon ta sa kaaway natong nasud, magpalaban ba kita sa China? Sumpoon ang krimen ug kurapsyon sulod sa tulo ngadto sa unom ka buwan?

Si Duterte kapin sa 20 ka tuig nga mayor sa Davao pero nawagtang ba ang krimen sa Davao? Nawagtang ba ang kurapsyon sa Davao? Iyang giingon nga daghan siya og amigo, mao nga daghang salapi ang misulod sa iyang bank account, dili ba kini kurapsyon?

Kinsa man kadtong naghatag kaniya? Dili kaha kadtong mga smuggler ug drug dealer? Sigun sa giingon sa akong higala nga nakaila sa mga smuggler ug mga drug dealer, nakita niya kini nga aktibong nangampanya ni Duterte.