Kinsa’y mabulahan?

Usa ka semana na lang, ug sunod Lunes ato na nga pilion ang mga kandidato nga maoy atong tahasan pagdumala sa nasud sa mosunod nga tulo ka tuig, ug unom ka tuig.

Apan karong nagkaduol na ang piniliay, inay nga makasiguro na unta ang mga botante sa kandidato nga ilang botohan, human nila sila mapulsohi sa mga debate nga gipasiugdahan alang sa pagka-presidente, bise-presidente ug mga senador, mas nigrabe hinoon ang kalibog sa uban.

Gawas nga walay tarung nga mga plataporma, nanggawas ron ang daghang pasangil sa kurapsiyon. Usa sa giatraka sa mga pamasangil mao si Davao City Mayor Rodrigo Duterte, nga kun survey ang basehan, sigurado na nga modaog pagka-presidente.

Si Duterte sa sayo pa, nipresentar sa iyang kaugalingon nga limpyo gikan sa kurapsiyon ug kontra niya ang mga kurakot. Gani, napabilib niya ang kadaghanan sa yano ug dili maluho niya nga pinuy-anan sa Davao City. Bisan sa kapin 20 ka tuig na nga panerbisyo isip mayor, nahimo nga  bise-mayor ug kongresista, magmosketiro gihapon siya sa  pagkatulog.

Napabilib usab niya ang kadaghanan kun giunsa niya sa pagdumala ang Davao City gikan sa drug dealing, pagpatuman og curfew, no smoking, speed limit, pagkulata sa mga kawatan, mangunay sa pagpatrolya, magpaka-taxi driver ug sa pag-angkon nga iyang gipamatay kadtong mga piniriso sa Davao Penal Colony nga nibihag sa mga misyonero, nilugos ug nipatay sa usa ka Australyana.

Mas giabibahan siya sa iyang saad nga sulod sa tulo ngadto sa unom ka buwan, iyang limpyohan gikan sa drugas ug mga kurakot ang nasud kun siya ang mudaog. Sama sa desperado na kaayo ang Pilipinas ug pwerti na gyud nga luoya nga gikinahanglan na nga mogawas ang bida. Mura kita og nagtan-aw sa pelikula ni anhing Fernando Poe Jr nga "Kapag Puno na ang Salup", busa kalison na ang subra.

Apan ambot kun maapil ba kaha sa kalis si Duterte niining bag-ong pasangil ni Senador Antonio Trillanes batok sa iyang giingong binilyon ka pesos nga bank accounts nga wala niya gideklarar sa  iyang Statement of Assets, Liabilities and Networth (SALN).

Usa sa mga giangkon na ni Duterte nga nagdikidiki pa mao ang ilang joint account sa iyang anak nga si Davao City vice-mayor Sarah Duterte-Carpio sa BPI, nga iyang giklaro nga wala makaabot sa P211M, apan kapin gihapon sa gatos ka milyon ka pesos nga hinatag sa iyang mga higala isip birthday gift. Kangilngig og mga higala ni Mayor Duterte no, kinsa kaha sila?

Giingon nga gituyo ang pagpagawas niining maong kasayuran pipila ka adlaw sa dili pa ang election aron maguba ang kredibilidad ni Duterte.

Atong panghinauton nga ang makabenepisyo sa mga nanggawas karon nga mga isyu batok sa atong mga piliunon mao kitang katawhan ug dili ang mga politiko nga sama nilang Bise Presidente Binay nga nag-atubang pa og daghang kaso sa pangurakot, Senador Grace Poe kansang motibo kadudahan tungod sa mga nagpaluyo kaniya, Senador Miriam Defensor Santiago nga dugay nang nangandoy sa pagka presidente apan naabtan na lang sa iyang pagkaluya ug si Mar Roxas kansang liderato gitan-aw nga huyang.