Nagkutoy ang tiyan!

Niadtong nakalabay nga semana, gisugdan sa dakbayan sa Sugbo ang water caravan sa mga bukirang barangay sa dakbayan sa Sugbo nga gipasiugdahan sa task force water nga giumol sa Cebu City Hall.

Dala nila ang 500 ka galon sa tubig nga mainom ug upat usab ka fire trucks nga adunay sulod nga tubig nga magamit sa pangkaligo ug panglaba.

Apan pag-abot pa lang nila sa usa ka barangay, ingon sa gitilapan ra ang dala nilang tubig tungod kay hingpit na nga nabaseyo ang ilang mga sudlanan.

Nasaksihan nako mismo ang kataas sa linya sa mga galon, baril ug bisan unsa nga kasudlan sa tubig nga gilinya daplin sa karsada nga nagpaabot nga kasudlan kini og tubig.

Apan dili lang diay kauhaw ang problema karon sa mga lumolupyo sa kabukiran, kon dili, ang kagutom gumikan kay hingpit na nga nangadaut ang ilang kaumahan nunot sa nasinati nga huwaw.

Gibutyag ni Dr. Ester Concha, pangulo sa DSWS sa dakbayan sa Sugbo, nga 31 ka barangay sa siyudad ang nahuman na nila sa paghatag og mga bugas ug delata nga pagkaon, apan kulang ra kaayo.

Mga 500 ka pamilya lang kada barangay ang ilang nahatagan og tulo ka kilo nga bugas ug lima ka lata nga sardinas. Kasamtangan nga gipahigayon nila ang ikaduhang hugna sa pagpanghatag og mga pagkaon.

Gisaysay ni Dr. Concha nga adunay mga pamilya nga maglinya nga maghilak tungod sa gibati nga kagutom kay wala na sila’y malung-ag.

Ang P6 milyones nga gipagawas sa DSWS alang sa food assistance sa mga biktima sa El Niño kuwangon ra kay molanat pa man og dugay kining nasinati nato nga huwaw, ug gani mosamot pa man kainit, matod sa mga eksperto sa PAGASA.

Kun nakasinati og ingon niini kagrabe nga suliran, ang Cebu City nga progresibo nga siyudad, unsa na lang kaha ang uban nga mga lungsod sa lalawigan sa Sugbo ug mga kasikbit nga mga probinsya?

Ang uhaw ug gutom usa na kini ka nasudnong katalagman nga napasagdan tungod kay nakatutok ang mga namunoan sa pagpangampanya aron masiguro ang ilang kadaugan bisan pa man kun ang ilang mga konstituwente nagkutoy ang tiyan.