Happy-Happy ni Duterte
Sama ni Davao City Mayor Rodrigo Duterte nag-usab-usab sab ang mga numero sa namasangil niya nga si Senador Antonio Trillanes mahitungod sa kontrobersiyal nga mga deposito sa Bank of the Philippine Islands (BPI) nga giingong gitago ni Duterte gikan sa iyang statement of assets, liabilities and net worth (SALN).
Hinaot nga maklaro na gyud kinsa nila’y nagsulti sa tinuod ug kinsay namakak kun mag-abot na karong Lunes silang Trillanes ug ang abogado ni Duterte sa BPI branch sa Julia Vargas Avenue sa Pasig City. May sukaranan hinuon ang kabalaka nga tungod sa kataas sa hilanat sa politika mosangpot lang sa dugang kalibog ang gikahinaman nga engkuwentro.
* * *
Niang nag-usab-usab nga mga numero ni Duterte:
Una, niinsistir nga wa siya’y bisan usa ka dako nga deposito sa BPI Julia Vargas ug nga ang bank account bunga lang sa hunahuna ni Trillanes;
Ikaduha, dihang napamatud-an nilang Trillanes, sa mga sakop sa media ug sa kampo ni kanhi Interior Secretary Mar Roxas pinaagi sa pag-deposito og kuwarta sa nabistong account number, niangkon si Duterte nga duna diay siya’y duha ka account sa BPI pero P17,000 ug P50,000 ra ang mga deposito; ug
Ikatulo, human sa pila ka oras niangkon na sab si Duterte dul-an ra sa P200 milyones diay ang iyang deposito, naglibog lang siya tungod sa kadaghan sa mga zero.
* * *
Di hinuon monopoliya ni Duterte ang pag-usab-usab sa mga numero. Natakdan niya si Trillanes:
Una, nipasangil si Trillanes nga P211 milyones ang kuwarta ni Duterte sa BPI Julia Vargas branch;
Ikaduha, gipausbawan ni Trillanes ngadto sa P227 milyones ang gitago nga deposito nilang Duterte ug sa iyang anak nga si Zara Zimmerman Duterte; ug
Ikatulo, niingon si Trillanes nga nikabat og P2.4 bilyones ang kinatibuk-ang mga transaksiyon sa 17 ka accounts ni Duterte sa duha ka bangko sa Metro Manila ug usa ka bangko sa Davao gikan sa 2006 ngadto sa 2015.
* * *
Kun kapamatud-an ang dakong deposito, mapugos si Duterte sa pagpasabot sa mga tinubdan sa makalilisang nga kuwarta. Tungod sa iyang pagdagan sa labing taas nga katungdanan sa nasud, nagkinahanglan ang mga magbubuhis og mas detalyado nga kasayuran gawas sa iyang giingon nga “daghan siya og adunahan nga mga higala.”
Mag-atang sab sa mas katuohan nga katin-awan silang Ombudsman Conchita Carpio-Morales ug ang kadagkoan sa Anti-Money Laundering Council (AMLC), ug di ikahibung kun ma-interes sab si Commissioner Kim Henares sa Bureau of Internal Revenue (BIR), nganong wa ideklarar ni Duterte ang dakong katigayonan sa iyang SALN ug income tax return (ITR). Kay mura’g ang lunod-patay rang mga dumadapig ni Duterte ang motuo nga wa na niya itug-an ang kuwarta kay nahurot na sa iyang “happy-happy.”
- Latest
