Out of court settlement

Dear Atty. Divine,

Aduna ko’y usa ka anak nga anaa karon sa akong ugangan nagpuyo tungod kay milarga man ko abroad. Akong nahibaw-an nga ang akong bana aduna nay laing babaye ug tua karon sa Manila.   Miuli   ko   sa   Pilipinas   kay   gusto   ko   nga   makakita   ug   makauban   ang   akong   anak. Nagsabot mi sa akong bana nga akong huwaman ang bata sud sa usa ka semana. Sa dihang ako na   nga giadto   sa  ilang balay  gitagoan   man   ang   bata  sa   akong   ugangan   ug   wa   gyud   nako makauban ang akong anak sa ako karong pagbakasyon. Nakadesisyon ko Atty. nga akong kuhaon ang bata. Unsay una nako nga buhaton? Hinaut imo kong matabangan.  Daghang salamat.—Lisa

Dear Lisa,

Kun ang balaud ang atong basihan, ikaw isip inahan mas duna kay katungod sa imong anak kay sa imong ugangan busa dili unta angayan nga ihikaw kanimo ang bata ug aron  imong makauban ang bata sa imong pagbakasyon. Ang  una nimong buhaton mao ang pagduol sa  DSWD sa lugar diin nagpuyo ang imong anak ug ang imong ugangan aron sa pagpangayo og ayuda kanila kalabot sa imong tinguha nga imong makauban ang bata. Kun dili  gyud ihatag sa imong ugangan ang bata bisan sa pag-intervened sa DSWD then mudangop  gyud ka sa korte pinaagi sa pagpasaka og kaso. Apan kay imo ra man kining ugangan mas maayo ang out of court settlement kay I’m sure ang imong ugangan naghuna-huna sab sa kaayohan sa bata so mas maayo nga inyo kining sabutan lakip na sa imong bana nga kun nia ka sa Pilipinas dapat anha kanimo ang bata ug kun molarga anha sa imong ugangan ang bata. 

Mas dali man gud kun inyo kining aregluhon ug kanang korte katapusan na nimong lakang kun dili gyud nila ipakita kanimo ang imong anak.

Thanks and God Bless. Atty. Divine

* * *

Alang sa inyong pangutana, ipadala lang sa Legal Corner sa  Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column mata’g Miyerkules, Sabado ug Domingo.