DuDirty magic
Pagpamalikas ug bisan unsa nga mga negatibo nga pulong ang manggawas gikan sa baba ni Mayor Rodrigo Duterte. Ingon niini ka hugaw ang baba ni Digong alang sa iyang mga kritiko ug gigamit kini nga isyu sa iyang mga kontra aron mabitad paubos ang Mindanawan Presidential candidate.
Gikan sa iyang pagbalikas ni Pope Francis, paghimo nga kataw-anan sa nahitabo nga paglugos sa usa ka Australian missionary, pagresbak sa kumento sa mga embahador sa Australia ug Amerika nga kung siya ang mapresidente putlon ang diplomatikanhon nga kalambigitan. Wala’y pakialam si Duterte sa mamahimong sangpotanan sa iyang mga aksyon diin gipakita niya ang laksot nga personalidad nga inay tradisyonal nga pagpapogi o makigplastikan sa publiko atol sa kampanya, ang tinuod niyang personalidad ang iyang gipakita. Ambot kung taktika lang kini sa kampo ni Digong aron kanunay siya mamahimong sentro sa attention sa katawhan. Kung campaign strategy kini, milampos sila sanglit inay moubos ang iyang survey rating kabaligtaran ang nahitabo sanglit misulbong na man hinuon ang iyang survey rating.
Na syot sa taro ang media ug labaw na ang iyang mga kontra nga misakay sa isyu kay sila man ang mitabang sa pagpasikat ni Digong. Mas kontrobersiyal mas init ug mas sikat. Nawani ang iyang mga kontra nga nagpaka Mr. & Mrs. Clean bisan pa man og adunay mga lapok sa agtang. Ang ako lang gikabalak-an kung unsa ang mamahimo nga sangpotanan sa higayon nga makalingkod gyud sa gahum si Digong.
Dili ang DuDirty mouth kun dili ang Dudirty hands ang angayan nga kalisangan kung unsa ang mamahimo nga buhaton niini. Basin og gamiton kini dili lang batok sa mga kriminal kun dili apil sa pagpatak-om sa mga tawo nga mosaway kaniya. Hinuon anaa ra sa mga botante kung magpadala sa DuDirty magic.
- Latest