Kinsay inyoha?

Sugod sunod semana, matibuok na ang desisyon sa matag botante kinsay ilang botaran pagka-presidente, bise presidente, senador, kongresista, mayor ug mga konsehal, ug party-list.

Ang resulta sa survey nianang mga panahona magtug-an usab unsay mogawas nga resulta sa eleksiyon sa Mayo 9. Niana usab mga panahona mahitabo ang binirahay og mga dumapig. Ang mga dagkong partido mangamang usab sa mga dagkong mga grupo, ug madunggan nga adunay mga dagkong grupo nga mopadayag sa ilang suporta sa usa ka kandidato o motapon gikan sa naandan nilang gisuportahan ngadto sa bag-o nilang kandidato.

Dinhi sa siyudad sa Sugbo, nadungog nako nga nagbali ang sitwasyon sa Team Rama ug Bando Osmeña Pundok Kauswagan. Matud sa atong dewende sa politika nga ang Team Rama kusog sa habagatang distrito sa siyudad, samtang ang BOPK maoy kusog didto sa amihanang distrito.

Adunay mga sitio nga giduaw sa Team Rama didto sa amihanan nga minus kaayo ang manambong, nagpasabot nga ang maong mga sitio tua magsuportaan sa BOPK. Samtang adunay mga pulong-pulong ang BOPK sa habagatan nga gipanglangaw. Mao kini giingon nilang "sikit" nga panagsakbang og balik nilang Mayor Mike Rama ug kang kanhi mayor Tomas Osmeña.

Didto sa Mandaue, nagkakusog og samot ang kampo ni Lolypop Ouano-Dizon kontra sa tapulan mangampanyang si Kongresista Luigi Quisumbing.

Daan pa hinuon kaniadtong wala pa mahimong opisyal si Lolypop sa dihang iya pang amahan nga si Teddy ang mayor sa Mandaue nga hilabihan na kasuod sa mga Mandauehanon si Lolypop.

Apan mura'g naglisod si Paulus Cañete ni Mayor Jonas Cortes. Kun mao kini, matuman na ang "concession" nga gidesinyo ni Jonas, nga samtang siyay kongresista sa siksto distrito, usa ka Ouano ang mayor. Sumala pa sa atong duwende sa politika didto sa Mandaue nga mao kini kasabutan kaniadtong buhi pa si Teddy, nga gihangyo kini ni Luigi nga dili siya (Teddy) padaganon pagka-kongresista aron dili siya maglisod, samtang iya lang "paluagan" ang pagka-mayor. Mao na nga si Luigi iyang gikumbinser nga mosakbang kang Lolypop. Ang mga Quisumbing wala lang mahibalo nga si Luigi gilawog ra gyud diay sa tirong.

Sa dakbayan sa Talisay, adunay nagsulti kanato nga sikit ang panagsakbang nilang Bise Mayor Romeo Villarante ug kanhi kongresista Eduardo Gullas, samtang biya na kaayo si Mayor Johnny delos Reyes. Masabtan nato kini kay si delos Reyes sa sinugdanan wala man gyuy iyang kaugalingong tawo.

Gawas nga taga-Mindanao si delos Reyes ug midayo lang sa Talisay pagpalambo sa iyang negosyong tambal sa luas, sukad sa 1998 nga pagsige'g kapilde niya, wala gyud siyay iyang tawo. Midaog lamang siya niadtong 2013 tungod sa suporta sa mga lunod-patay'ng mga tawo ni Villarante. Sa laktod, kanang mga tawo ni delos Reyes  karon, mga tawo kana ni Villarante.

Sa Lapu-Lapu, nakatimaho na og kadaogan si Mayor Paz Radaza kontra sa tulo niya ka mga kontra - silang Lando Patalinjug, Jun Pelaez ug Angel Rodriguez.