EDITORYAL - Narco-politics

Daghan ang nakamatikod nga kuwartahan kaayo karong eleksyona ang ubang mga kandidato nga nagpapili sa mga dagkong katungdanan sa kagamhanan.

Tingali, daghan ang mga magpapatigayon nga mihatag kanila og tabang-salapi aron magamit nga ilang panggasto alang sa eleksyon. Wala kini idili sa balaod sa Comelec.

Ang gilatid lang sa Comelec mao nga ang kandidato kinahanglan nga mohatag og kwentada ngadto sa publiko kun pila ang iyang nadawat nga donasyon, ug kun kinsa ang naghatag kanila niini.

Mitumaw karon ang kabalaka nga milihok na ang gitawag nila nga Narco-politics, diin ang mga tawo nga nagpadagan og negosyo sa ilegal nga drugas, motabang pagpadaog sa mga higala nila nga kandidato.

Sayon kaayo sabton nga ang ilang tumong niini aron nga adunay makalaban kanila kun ang kapolisan mopiit sa ilang negosyo, ug natural nga dili usab sila talikdan sa mga opisyal nga nakadawat og donasyon atol sa eleksyon.

Nabaniog nga adunay kandidato pagka mayor sa usa ka lungsod sa Leyte nga giingong drug lord nga gipapanumpa sa usa ka mayor dinhi sa Sugbo isip sakop sa dakong politikanhong grupo.

Angay gyud unta nga ang mga politikanhong grupo mamili og ilang mga kaalyado aron dili sila katahapan nga misapupo niining tawo nga dili maayo og record.

Kinahanglan usab nga ang mayor nga taga Sugbo magmatngon gyud unta aron kalikayan nga makapangutana ang katawhan kun ngano nga suod man siya sa pipila ka tawo nga gikatahapang nagnegosyo og drugas.

Kun molampos gud ang mga drug lord sa ilang tinguha pagpadaog og mga kandidato sa umaabot nga eleksyon, ilabi na sa pagka kongresista ug senador, sigurado nga lisud na kaayong pukanon ang negosyo sa ilegal nga drugas dinhi sa nasud.