Saint Valentine

Alang sa bag-ong henerasyon, ang Valentine's Day mao ang pagsaulog sa adlaw sa mga kasingkasing. Mga kasingkasing nga nagkahigugmaay. Mapadayag ang maong gugma pinaagi sa simbolismo sa puwa nga rosas ug sa kasingkasing. Karong adlawa gisaulog sa Simbahang Katoliko ang adlaw sa kamatayon ni Saint Valentine. Apan kinsa ug unsa ba si Saint Valentine?

Hangtod ron wala’y klaro ang kasaysayan kun kinsa si Saint Valentine. Daghang tawo nga ginganlan og Valentinus o Valentine. Apan sa Catholic Encyclopedia ug ubang tinubdan sa hagiography, kon ang mga sinuwat mahitungod sa kinabuhi sa mga santo, adunay tulo ka tawo nga ilang giila nga si Saint Valentine.

Ang una si Valentinus nga usa ka paring Romano, ang ikaduha usa ka pari gihapon, ang Obispo sa Interamna nga karon mao ang Terni, Italy, ug ang ikatulong Valentine nga giingong santo gipatay sa adlaw sa Febrero 14 uban sa pipila ka kaubanan didto sa usa ka probinsya sa Africa.

Apan wala nay dugang kasayuran sa tinuoray nga pagkatawo sa giingong santo. Sa unang duha ka paring Valentine gituohan nga usa ra ang ilang pagkatawo.

Sa opisyal nga biography sa Diocese sa Terni, si Bishop Valentine natawo ug nagpuyo sa Interamna. Gibilanggo, gipaantos ug gipatay didto sa Roma sa Febrero 14, 269.

Ang iyang patay’ng lawas gidali paglubong didto sa menteryo sa dapit nga siya gipatay. Pipila ka adlaw human siya gipatay gikuha sa iyang mga disipolo ang patay’ng lawas ug gidala sa iyang pinuy-anan ug didto gilubong.

Apan sa Roman Martyrology, ang giila nga Santo sa Simbahang Katoliko usa ra. Siya si Saint Valentine nga gipatay niadtong Febrero 14 didto sa Via Flaminia nga usa ka karaan nga agianan sa Roma.  Siya mao si Bishop Valentine sa Terni, Italy.

Base sa mga limitadong sinuwat sa kinabuhi ni St. Valentine gipaubos siya sa house arrest sa usa ka huwes sa Roma nga si Asterius. Sa iyang pagkadinakpan, nagpadayon sa pagpanudlo si Bishop Valentine sa kinabuhi ni Kristo.

Si Judge Asterius nga naikag sa hugot nga pagtuo ni Bishop Valentine nisukod niini. Iyang gihagit si Bishop Valentine sa pagpahiuli sa panan-aw sa iyang sinagop nga babaye. Bugti niini, iyang ihatag ang tanang gusto ni Bishop Valentine.  Tuod man, sa pagtapion ni Bishop Valentine sa iyang mga kamot sa mga mata sa bata, naulian kini ug nahibalik ang iyang panan-aw.

Gimando dayon ni Bishop Valentine ngadto kang Judge Asterius nga buk-on ang tanang imahen sa mga diyos-diyos sa iyang panimalay, magpuasa siya sulod sa tulo ka adlaw ug kinahanglan nga siya magpabunyag.

Gituman kini ni Judge Asterius ug iyang gibuhian ang tanang Kristiyanong binilanggo ug nagpakombertir siya pagka Katoliko kauban sa iyang pamilya ug 44 ka kaubanan sa panimalay. Apan gipadakop na usab si Bishop Valentine ni  Emperor Claudius Gothicus sa Roma tungod sa iyang padayong pagpangombertir. Mas nisamot ang kasuko ni Emperor Claudius ngadto ni Bishop Valentine tungod sa iyang pagsuway pagkabig kaniya.

Gipaantos ni Emperor Claudius si Bishop Valentine pinaagi sa pagpakulata aron isalikway ang iyang pagtuo. Apan nagpabilin sa iyang hugot nga pagtuo ni Kristo si Bishop Valentine hangtod nga ang obispo gipaputlan sa ulo ni Emperor Claudius.