Daghan apan nagkatibuwaag
Human laslasi sa Land Transportation Franchising and Regulatory Board (LTFRB) ang minimum nga plitehan sa public utility jeepneys (PUJs) gikan sa P7.50 ngadto sa P6.50 ug ang flagdown-rate sa taxis gikan sa P40 ngadto sa P30, nitiyabaw ang mga pasahero sa mga traysikol nganong nalansang ang minimum nila nga plitehan sa P8. Nga unta ang mga drayber ug operators sa traysikol nakapahimus man sab sa pagtidlom sa presyo sa lana.
Way hurisdiksiyon ang LTFRB sa mga traysikol. Kay gimando sa Local Government Code nga ibalhin ngadto sa local government units (LGUs) ang gahom sa Department of Transportation and Communications (DOTC) ug LTFRB sa paghatag og prangkisa sa mga traysikol.
* * *
Nagkalainlaing LGUs nihupot og managlahi nga mga lagda sa pagduma sa operasyon sa mga traysikol sa mga lungsod ug dakbayan sa Sugbo ug ubang bahin sa Pilipinas. Bisan ubos gihapon sa superbisyon sa DOTC, ang mga mayor na maoy magbuot sa ruta ug plitehan sa mga traysikol.
Sa ato pa, ang bagulbol sa kataas gihapon sa plitehan sa mga traysikol angay’ng isang-at ngadto sa mga mayor ug di sa LTFRB. Samtang langayan kaayong LTFRB pagtuman sa ilang trabaho, wa kong kabantay og bisan usa ka mayor ni LGU sa Sugbo nga nisubli ug nilaslas sa plitehan sa ilang mga traysikol bisan sa mas baratong lana.
* * *
Di na lang ta motan-aw sa layo. Usa sa posibleng katin-awan sa pagpangiyugpos lang sa mga mayor sa kalungsoran ug mga dakbayan sa mas taas nga plitehan sa mga traysikol mao ang umaabot nga piniliay sa Mayo 9. Kasagaran nila nabalaka nga maibanan ang ilang mga boto kun hilabtan ang mga drayber ug operators sa mga traysikol.
Kay organisado ang mga drayber ug operators sa mga traysikol ug makalusad og hiniusang sumbalik-kampanya batok sa mga mayor ug ubang lokal nga mga opisyal nga magpapili pagbalik sa ilang katungdanan, nagpabungul-bungol lang ang mga politiko sa sibaw nga awhag sa mga pasahero.
* * *
Nganong gipalabi man sa mga politiko ang mga drayber ug operators ug gipasagdan lang nga padayong maalkanse ang mga pasahero sa mga traysikol? Ang yanong tubag: Mas daghan ang mga pasahero apan di organisado. Sibaw tuod ang ilang reklamo apan wa magkahiusa. Maong intawon wa paminawa sud na ron sa daghan uyamot nga katuigan.
Maong mangahas ko pag-awhag sa mga pasahero sa paghiusa. Ang ila lang hiniusang pagtingog ug paglihok ang makapapugwat sa lokal ug nasudnong mga opisyal sa gobiyerno pagtakda sa mas makiangayon nga plitehan ug ubang mga lagda sa industriya sa transportasyon. Kun magkatibuwaag lang gihapon, sama karon, pabiling maghupot sa sayop nga pagtuo ang mga politiko nga ang mas organisadong mga drayber ug operators ang makapadaog nila.
- Latest
