Sayop nga entry sa birth certificate

Dear Atty. Divine,

Duna ko’y problema sa Birth Certificate sa akong duha ka anak kay ang apelyido nga gigamit nako sa ilang Birth Certificate, ang apelyido man sa akong kanhi live-in partner.

Nagbuwag na mi sa akong live-in partner. Ang ako untang gusto nga apelyido gihapon sa ilang amahan ang ilang gamiton, apan ang akong apelyido akong ipausab aron sab ang akong apelyido maoy gamiton nilang middle name. Unsay angayan nako nga buhaton? Mahimo ba gihapon nako sila nga maapil sa PhilHealth bisan kun dunay sayop ang ilang Birth Certificate? Daghang salamat. — Mae

 Dear Mae,

Kun adunay sayop nga entry sa Birth Certificates sa imong mga anak, mahimo kini nimo nga pakurihian pinaagi sa Local Civil Registrar or pinaagi sa korte, depende kun unsa ang imong ipausab.

Ang maayo nimong buhaton mao ang pag-adto sa Local Civil Registrar ug pangayo og listahan sa mga rekisitos nga angay nimo nga i-submit kanila alang sa correction of entry sa Birth Certificate.

Kun ang imong apelyido lang ang nasayop sa entry sa ilang Birth Certificates, then imo kining ipausab aron makurihian sab ang ilang middle name. Apan kun ang apelyido gyud sa mga bata ang imong usbon, hayan moagi ka gyud og korte sa maong proseso ug magkinahanglan ka na og abogado apan mas maayo nga imo usa nga konsultahon ang Civil Registrar kay basin mahimo ra nga adto sa ila process ang pag-usab.

Samtang kalabot sa PhilHealth, mahimo nimo nga ikarga ang imong duha ka anak. Kun makurihian na ang ilang Birth Certificate, then mo-submit na lang sab ka sa PhilHealth sa maong dokumento. Thanks and God bless. – Atty Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_ [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo