EDITORYAL - Bation og kabalaka

Di maayong paminawon kining nanggawas nga mga pamahayag sa Comelec nga aduna silay nabantayang mga 'glitches' o mga sayop-sayop sa gihimo nilang pag-testing sa mga precinct count optical scan (PCOS) sa gihimo nilang mga test.

Aduna pa nigawas nga report nga hayan adunay mga lugar unya sa nasud ang dili makapahigayon og eleksyon tungod kay nalangan na ang schedule sa pagprinta sa mga balota tungod gihapon sa 'teknikal' nga isyu.

Bisan pa man sa ilang gipasiatab nga mas maayong ila kining nadiskubrehan sa wala pa ang adlaw sa eleksyon ug makorihian pa kini tungod kay aduna pa may kapin duha ka buwan paghimo niini di kalikayan nga bation og kabalaka ang mga tawo.

Sa kinaiya sa politika sa nasud, kining mga ingon niini nga mga pamahayag dili makatabang sa pagpalig-on sa kredibilidad sa Comelec ug sa resulta unya sa eleksyon.

Dili kini angay unta nga himuong sumsoman sa estorya tungod kay tanang mga politiko ilabi na kadtong gikan sa oposisyon manggidudahon ra ba gyud nga sila tikasan sa administrasyon.

Samtang tinuod maayo nga ilaha kining ipahibalo sa tanan matag aduna silay mga problemang masugatan sa pag-testing sa mga makina, angay kining buhaton sa paagi nga dili magduda ang mga kandidato ug labaw sa tanan ang publiko.

Karong adlawa himuon ang national 'mock elections' sa nagkadaiyang pilot areas gikan sa nagkalain-laing suok sa nasud nga ang tumong mao ang pag-testing sa mga makina sa pagbotar.

Iampo na lang nga walay mga dagkong kakulian sa pag-testing ug sa pag-transmit sa mga datos gikan sa mga presinto ngadto na sa buhatan sa Comelec diin himuon ang ihap aron mapapas ang kabalaka sa katawhan.