Cash distribution karon

Karong adlawa, about 66,000 senior citizens in Cebu City will be richer by P2,000. Kini, sumala pa nila ni OSCA Head Doming Chaves ug Boy Antig, presidente sa Capitol Site Senior Citizens chapter ug sakop sa Cebu City Senior Citizens Council.

Sama sa naandan, ang distribution anha himoa sa mga barangay, diin gumikan sa mga paningkamot sa buhatan sa mayor, ug pag-abag sa mga opisyal ug empleyado sa barangay, wala na’y hasol ang pagpang-apud-apod sa cash gift. Hapsay na kaayo.

Sa among barangay Guadalupe pananglitan, sulod na sa milabay nga tulo ka tuig, convenient na kaayo ang sistema. Sa akong bahin, in less than three minutes, gikan sa akong pag-atubang sa tighatag sa kuwarta, nakakobra na ko. Hayahay na kaayo.

Ang laraw mao nga himoon nga quarterly ang cash distribution, sa ato pa, sa Marso pa unta kita makasapi, apan, matud ni Boy Rama nga usa sa mitabang nga madali ang pagpamirma ni Doming sa payroll, gi-advance ang cash distribution, aron magamit sa Valentine’s Day, adlaw ra ba nga Domingo.

Ang Valentine’s Day, dili kay alang ra sa mga batan-on, kon dili, alang sa tanan kay ang paghigugmaay ug ang pagpitik sa kasingkasing dili mag-agad sa edad. Hinoon, sa mga senior citizens, hunahuna na lang usahay ang magdako.

Lagmit sa Marso, dili kay ang balance nga P1,000 ra ang atong madawat, kundili, P2,000 gihapon, advance nga P1,000 for the second quarter, in time for the Holy Week.

* * *

Adunay mga laraw pagpa-us-os sa edad sa senior citizen, gikan sa 60 ngadto sa 56 base sa House Bill 6340 nga gipangamahanan ni Rep. Rodel Batocabe sa Ako Bicol party-list.

Gisugyot ni Batocabe ang pag-amendar sa RA 7432 kon Senior Citizens Act nga nag-define sa senior citizen nga usa ka tawo nga nagpanuigon na og 60.

Matud ni Batocabe daghan na kuno kaayong mga nag-edad pa og 56 nga ang panglawas nagkinahanglan na og pagtagad, ug ang mga benepisyo nga karon gipahimuslan sa mga senior citizens, ila usab unta nga mapahimuslan.

Niini nga balaudnon, mapaubsan ang retirement age gikan sa 60 ngadto sa 56. Generally, niining maong panuigon, lig-on pa ang atong kalawasan. Sa ato pa, sa maong pag-retire, ug sa pagka-senior citizen na daghan pa og mahimo.

Wala kini maaktohi sa miagi’ng kongreo, apan matud ni Batocabe, ila kining i-refile sa 17th Congress, sama sa balaudnon nga mag-usbaw by P2,000 sa SSS pension, nga i-refile usab ni Rep. Neri Colmenares sa sunod nga Congressional sessions.