Ang kaanindot sa panan-awon

Ang kapasidad sa atong panghunahuna, nagsukad kini kun giunsa  nato gihan-ay ang kalig-on ini. Nagdepende usab kini sa mga kasinatian  nga napanday diha sa atong pagpakabuhi. Daghan ang mosalida nga mokulit sa mga panumdoman, nga di kalikayan nakig-indigay aron hulmahon ang nindot nga panan-awon, nga mahimong kabahin ni sa  kaugmaran sa mga gipangandoy.

Tingali nakaamggo  kita, nga usahay may higayon nga ang kaaburido sa kahago sa grabeng panghunahuna, nahulog nga ngil-ad ang motumaw nga panan-awon sa kinabuhi. Gani moabot ang kapuol, hangtud nga kapoyan kita sa pagpangabkab og maayong kahigayonan, aron itampo ang talan-awon sa palibot nga idayan ang hingpit nga paghulagway sa labing nindot nga panan-awon.

Apan usahay sab, mosukwahe ang paghubad nato sa kaanindot, nga nahimong ngil-ad kini alang sa uban. Unsaon man sab nga igo ra man gisalig sa hunahuna, nga way pagsulay nga gibuhat, maong gidaug sa katahap, nga nakapahuyang sa pagsalig sa kaugalingong katakos.

Di kita angay motagam, kay alkanse ta sa dag-anan sa kinabuhi. Aduna la'y kausaban nga himuon nga tamdanan, samtang giayo ang dalan sa kalampusan. Ihabak kining kusog o gahom, aron pagseguro nga kita makaabot sa unahan.

Ang rekisitos nga ato gyu'ng buhaton, mao ang hugtanay nga pag-andam sa kahimsog sa panglawas, panghunahuna ug spirituwal, nga himuong lig-ong pundasyon sa pakigbisog. Positibong lig-on nga di maugtas sa kalisdanan. Way kahinugon nga mopuhona'g kusog ug pagtoo, nga malaumon sa paglahutay.

Ipukos sa pagmatngon nga aninawon ang palibot nga di mahaylo sa lit-ag nga lakturon, aron isaag ka sa padulngan.

Mokupot permi'ng nanghawid sa katarong nga mangayo'g tabang sa Dios, aron kahayag mogilak sa panan-awon.