Patay na ang BBL

Karon nga mi-adjourned na ang mga sakop sa Kongreso alang sa eleksiyon sa Mayo, nawad-an na usab ang mga suporter sa Bangsamoro Basic Law (BBL) og paglaum nga mapasar kini.

Patay na ang BBL ilalum niining administrasyon ni Presidente Benigno Aquino III tungod kay wala nay magbabalaud nga moukay pa niini. Ug patay na usab ang pangandoy sa Moro Islamic Liberation Front nga makaukit og otonomiya sa Mindanao niining panahona ilalum sa BBL.

Human sa pipila ka bulan nga debate mahitungod sa legalidad sa BBL, wala gayud maka-score ang maong proposed nga balaudnon sa mga magbabalaud. Kadtong mialkontra niini dako’g pagtuo nga dili gayud kini ang solusyon sa kagubot sa Mindanao.

Ang dakong dangan sa BBL mao kadtong nahitabong engkwentro tali sa mga rebelde’ng Muslim ug Philippine National Police sa niaging tuig didto sa Mamasapano sa Maguindanao nga mipatay sa 44 ka sakop sa Special Action Force sa kapolisan.

Sa kontrobersiya sa Mamasapano incident, daghan ang nakabatikos sa MILF tungod sa ka kulang niini sa aksiyon pagtabang sa imbestigasyon sa kagamhanan. Gani, hangtud karon wala gayud moako ang maong rebelde nga grupo nga aduna kini lapso sa maong insidente.

Hinuon mahimo pa ang BBL nga ma-refile sa mga proponents niini sa sunod nga pag-abli sa Kongreso. Ug kun mahitabo kana, magsugod na usab ang mainit nga debate sa mga magbabalaud.

Niining panahona, putol na ang mga pako sa BBL. Dili na makalupad ang BBL alang sa giingon sa mga mipabor niini nga kalinaw nga maoy sinugdanan unya sa tinuoray nga kalamboan sa Mindanao.

Apan wala koy nakita nga tinud-anay nga kalinaw sa Mindanao ilalum sa BBL. Kini tungod kay sa ako nang gikaingon kaniadto, kulang sa kahiusahan ang atong igsuong mga Muslim didto alang sa pagpakigsabot sa kagamhanan.

Usa lamang ka grupo sa mga Muslim ang hugtanong miduso sa BBL. Ug kini mao ang MILF, kinsa padayong nagtiner og mga armas. Ug unsaon man sa Mindanao pagbaton og kalinaw kun kining mga rebeldeng grupo padayon pa sa pagpakigbatok sa kagamhanan. 

Isip natawo ug nagtubo didto sa Mindanao, usa ako sa nangandoy alang sa tinud-anay nga kalamboan didto. Apan unsaon man sa pagbaton niini kun mismo ang mga rebeldeng grupo padayon usab sa pagdumili pagtahan sa ilang armas alang sa kalinaw.