Abo
Miyerkules sa Badlis niadtong Miyerkules ug nasugdan na usab ang laing Lenten Season. Ning panahon gidapit kita sa pagpamalandong sa Abo nga maoy simbolo sa atong gigikanan ingon man sa atong paulian. Daghan kaayo kita og mga pangandoy apan ang tanan mahimong atong mabiyaan gumikan sa kamatuoran nga ang tanan dunay utlanan bisan na sa atong kinabuhi. Mao nga diha sa atong panaw mahinungdanon kaayo ang pagpaubos kuyog niini ang mapailubong pag-angkon nga nagkinahanglan kita og Ginoo bisan pa man sa kahabog sa panganod sa atong mga kalampusan. Ug ang paghilom makatabang aron matugkad mo ang misteryo mas maayo pa kaysa imong igaray ang hataas nga diskurso sa mga pulong nga di mobagting sa tawhanong kasinatian.
- Latest