EDITORYAL - Panaad sa politiko

Paghimo og gamay nga research ug background checks ug dili mosalig sa mga bolatik sa kampanya sa mga politiko karong mga panahona. Kini maoy angayang himuong basehanan sa pagpili sa kinsa angayang mangulo sa nasud.

Angay  kining timan-an karong opisyal nang nagsugod ang kampanya sa mga nasudnong kandidato pagka-pangulo, bise presidente ug mga senador diin upat na lang ang opisyal nga kandidato sa labing taas nga posisyon dinhi sa nasud.

Kung ang kampanya lamang maoy tan-awon karon, way mapili kanila kun panindotay maoy hisgutan kay pulos lamang kini maayo paminawon kay naa pa man sa papel ug sa baba. Kining mga plataporma sa mga kandidato pulos lamang kini maayong paminawon ug basahon tungod kay gidesenyo man gyud kini aron makaagni og botante.

Apan angay nga hinumdoman nga kining tanan pulos pa lamang panaad ug wala pay kasigurohan kun ilang buhaton kun sa higayon nga makalingkod sila sa pwesto. Angay timan-an kun ang mga gipanaad posible ba gyud o dili, daghan ba ang makabenepisyo o basin pipila lamang, makaayo ba sa imahe sa nasud, unsa may kalabotan sa ilang gipanaad sa paglambo sa nasud, dili na ba kinahanglang usbon ang Batakang Balaod aron masunod ilang programa, importante ba ang ilang mga programa itandi sa anaa sa mga hunahuna sa mga botante ug uban pa.

Sa pagkakaron ang mga kandidato ‘believable’ kaayong manabi sa political rallies kay daw mahatag niini ang tanan basta lang siya maoy padag-on.

Aron mailhan ang tinud-anay nga kolor ug kapabilidad niining mga nagpapili, angay subayon ilang backgrounds sa nangaging katuigan ilabi na kun nakasohan ba sila o nalambigit sa mga buhat nga supak sa moralidad ug maayong pagtulon-an sa katawhan.

Unsa na man ang ilang mga nahimo sa dihang wala pa sila nangambisyon niining bag-ong posisyon?

Angay nga mahadlok ang mga tawo sa mamahimong lider nga magdala og kasamok inay nga kalamboan sa kinabag-an sa katawhan sa nasud.