Alas sa vote buying
Usa sa mga hinungdan sa pagdagan si kanhi Gobernador Tingting dela Serna pagka kongresista sa ika-unom nga distrito sa Sugbo pipila ka piniliay ang nilabay ug pila ka tuig human sa pagretiro na unta niya sa politika mao ang pagsusi modaog ba siya bisan di mamalit og boto.
Nahimuntog si dela Serna sa Kapitolyo niadtong 1992 pinaagi sa pagpilde ni Annette Osmeña, asawa ni kanhi Gobernador Lito Osmeña. Niadtong higayona, kabahin si dela Serna sa Big 4 sa politika sa Sugbo nga naglakip nilang anhing Sol Abines sa ikaduhang distrito, Junnie Martinez sa ikaupat nga distrito ug Ramonito Durano sa ikalimang distrito. Apan sa iyang pagdagan niadtong 2007, wa nay Big 4 nga nisabak ni dela Serna.
* * *
Sa buntag sa piniliay, nakadawat si dela Serna og desperadong tawag sa telepono gikan sa usa sa iyang mga lider sa Cordova. Nga nisumbong nga ang ilang mga dumadapig gisigehan na og haylo nga paliton sa iyang mga kaatbang. Gipasaligan siyang dela Serna nga magpabiling matinud-anon ang ilang mga dumadapig.
Pagkahapon, nibalik og tawag ang lider ni dela Serna pagpahibawo nga gidugangan ang kantidad nga gihaylo sa ilang mga dumadapig. Dihang nipasabot si dela Serna nga di sila mosumbalik og pamalit, nangiliyupo ang iyang lider, “Boss Ting, manghatag ta bisag P15 lang aron di sila mamali.”
* * *
Wa modugo si dela Serna. Ug napilde siya. Sa pikas nga bahin, sa piniliay sa usa sa mga lungsod sa silingang lalawigan sa Bohol, namalit sa mga botante ang tanang nagpapili pagka mayor. Sa bisperas sa piniliay, nitaho ang lider sa usa sa mga kandidato nga giduol siya og 15 ka botante nga wa maapil og palit sa pikas ug busa andam nga magpabayad nila.
Nibalibad ang kandidato nga igo nang napagawas nilang kuwarta ug igo nang napalit nilang mga botante pagpadaog niya. Human sa iskutenyo, naminghoy siya kay nalabwan siya sa mananaog og 8 ra ka boto.
Mao ni pait nga kamatuoran: Epektibo ang vote buying. Bisan sa ulug-ulog nga kamao nang mga botante nga modawat sa kuwarta apan mopili gihapon sa mga kandidato nga ilang gituohan nga labing takos ug labing ligdong, ang labing daghan og kuwarta ug ang labing daghan og mapalit nga mga botante kasagaran mao gihapoy mogawas nga mananaog.
Kay samtang ang mga politiko di na makapaluta sa mga balota, ang kaikog sa mapalit nga mga botante ang ilang alas. Kasagaran sa mga botante nga manawat kumbinsido nga managsama ang mga politiko ug nga mao ra gihapoy ilang kahimtang bisan kinsay modaog. Maong magpahimus na lang pag-ambit sa kuwartang ipabaha sa kampanya. Kun manghatag ang tanan, ang mas dako og ihatag maoy pasalamatan sa ilang mga balota.
- Latest
