Wanted Public Servant

Opisyal na nga gisugdan kagahapong adlawa ug molungtad hangtod sa Mayo 7 ang campaign period alang sa mga national candidates nga naglakip sa presidente, bise presidente, senador ug party-list groups.

Samtang sa Marso 25 pa usab ang campaign period sa mga local candidates. Nagpasabot lang kini sa unang hunat sa mga ambisyoso nga kandidato pagpakita sa tinuod nila nga tuyo ngano'ng gusto kunohay sila nga mag-alagad sa katawhan.

Apan pormalidad na lang kini sanglit dugay na man sila nga nagpahigayon og garapalan nga pangampanya ang mga kandidato, bisan gani kaniadto nga wala pa sila makaduso sa ilang Certificate of Candidacy.

Ingon niini sila ka baga og nawong, pulos mga oportunista, abi kay wala pa ang campaign period, hala tira sa kampanya sa radyo, telebisyon ug pamantalaan aron dili maapil sa kwentada sa oras nga gilatid sa Commission on Elections.

Apan karon nga niabot na ang gitakda nga panahon sa pagpangampanya, mosunod kaha sila sa patakaran sa kampanya? Makita ba sab kaha sa Comelec ang mga kalapasan, kun aduna man?

Dili na kinahanglan nga maghulat ta sa Comelec pagbadlong ug pagsilot sa mga malapason sa balaod tungod kay kita mismo nga mga botante ang mga huwes nga mao ang mosilot sa mga badlungon nga kandidato.

Hatagan nato sila og dako nga ZERO o dili angayan nga usikan nato paghatag kanila ang atong sagrado nga boto. Mga 90 ka adlaw na lang, eleksyon na, ug anaa ra kanato kun kinsa ang ato nga dawaton nga aplikante sa puwesto isip public servant.