Paglubong sa kaligdong

Pormal nang magsugod ang kampanya sa mga magpapili sa nasudnong mga katungdanan karong adlawa. Kay karong adlawa ang pagsugod sa 90 ka adlaw, o tulo ka buwan, nga campaign period sa nasudnong piniliay. Apan wa ni kahulogan alang sa mga politiko ug mga botante nga nahibawo nga hagbay rang nagsugod ang kampanya.

Ang uban nangampanya na human nasumiter ang ilang mga certifico de candidatura niadtong Oktubre. Ang mas una nga nakahukom unsay daganan nakabuylo na sa pagsugod pa lang sa niaging tuig. Gani, ang mas dugay nang nangambisyon ug mas dako pa gyod og puntil pila na ka tuig nga namostura.

* * *

Ang mga magsugod karon pang adlawa apiki na. Kay napamatud-an sa nangaging mga piniliay ang mga namintaha, gawas nga mas sayo nga nagsugod nagpataka pa gyod og papilit bisan sa wa na itugot nga mga dapit sa campaign materials nga nilapas sa gitakdang gidak-on ug gidaghanon, maoy gigantihan sa mga botante.

Sa pikas nga bahin, ang mga matinud-anon nga nituman sa mga lagda gibugal-bugalan sa ila mismong kaubanan sa partido nga naghilas-hilas. Bisan ang mga botante, inay mopahalipay sa ilang kaligdong, nisaway na hinuon nila nga nagpatuga-tuga og apil sa gikaintapan na nga duwa sa yawa apan di diay kamao nga mokupay og lapok.

* * *

Bisan ang pasidaan sa Commission on Elections (COMELEC) ug sa nagpakabana nga mga pundok sa pribadong sektor nga pakauwawan ang mga epal (ang mga nagbinastos pagbandera sa ilang mga ngan ug mga panagway sa bisan unsang kahigayonan), wa makabaraw sa ilang pakauwaw.

Nagsalig sila nga pipila ra ang nagpakabana. Nga ang kinabag-an sa mga botante di magtagad giunsa nila pagmaniobra. Mas mahinungdanon alang sa mapahimuslanong mga politiko nga mahibawo ang labing daghan sa ilang pagdagan ug makumbinser nga silay angay’ng pilion karong Mayo 9. Bahala na kun manobra ang ilang gasto, mayatakan nila ang mga katungod sa ilang mga kaatbang ug malapas nila ang mga balaod.

* * *

Ang mga nagpatuyang sa pagpamintaha pagsabwag sa ilang campaign materials maoy labing dako og kahigayonan nga mopaundayon sa pagpanamastamas sa mga balaod sa makiangayong piniliay pinaagi sa pagtakda og presyo ug pagpangahas pagpamalit sa balaanong katungod sa pagpili sa mga botante.

Kun inutil nang daan ang COMELEC ug ang nagpakabana nga mga botante pagbaraw sa bantang nga paturagas sa campaign materials, mas lisod nga masakpan, mapamatud-an ug masilotan ang tago nga pagpabaha sa kuwarta nga mohaylo sa mga botante ug mga tagduma sa piniliay aron paglungi sa sangpotanan sa piniliay. May kahigayonan sa nangaging mga piniliay nga nidaog ang popularidad batok sa kuwarta. Ang masulub-ong balita mao nga ang popularidad ug kuwarta managsama nga di garantiya sa kaligdong ug katakos pagduma sa gidaganang mga katungdanan.  

[email protected]