Good luck sa mga kandidato

Magsugod na karong adlawa ang pagpangampanya sa mga kandidato sa nasudnong posisyon, sama sa presidente, bise presidente ug mga senador.

Una nga mohimo sa ilang proclamation rally ang Partido Liberal kansang kandidato pagka presidente mao si kanhi DILG Secretary Mar Roxas ug Kongresista Leni Robredo sa pagka bise presidente.

Ang ilang proclamation rally adto kini nila himoa sa Capiz ug Iloilo, ang giila nga balwarte ug hometown ni Roxas.

Sa akong nakita, duha lang ka partido ang mopakita og maayong labok sa pag-ilogay sa mga bakanteng posisyon ug kini mao ang Partido Liberal ug United Nationalist Alliance (UNA).

Kini tungod kay sila lang ang adunay kompleto nga makinarya alang sa pagpangampanya.

Ang Sugbo usa sa magdeterminar kun modaug ba ang kandidato sa nasudnong posisyon tungod kay mao kini ang adunay labing dako ug labing daghan og botante sa tanang lalawigan sa nasud.

Kun ang survey maoy basehan, daghan og botante si Duterte dinhi sa Sugbo. Gisundan siya ni Mar Roxas ug dayon ni Jejomar Binay ug Grace Poe.

Sikat si Duterte dinhi sa Sugbo, apan ang atong pangutana kun mahimo ba nga boto ang kasikat sa usa ka kandidato? Sa piniliay gikinahanglan ang makinarya.

Ang kasikat sa kandidato wala’y kuwenta kun wala siya’y makinarya. Mao ni ang problema ni Duterte ug Poe.

Wala sila’y makinarya dinhi sa Sugbo. Kun ugaling manguha man sila og mga lider, mga pinilian na lang ang ilang makuha tungod kay ang halos  tanan nakuha na ni Roxas ug Binay.

Si Gobernador Junjun Davide ug kanhi Mayor Tomas Osmeña solido na nga tagasuporta ni Mar Roxas, samtang si Atty. Winston Garcia maoy nagdala sa tingog ni Binay sa lalawigan ug si Mayor Mike Rama ang nagdala sa iyang tingog sa dakbayan sa Sugbo.