Kultura sa kurapsiyon

Nagkaduol na gyud ang piniliay sa Mayo 9. Gani sa Pebrero 9 sugdan na ang campaign period alang sa mga kandidato nga magpapili sa mga nasudnong posisyon.

Kun nakamatikod mo sa tanan nilang political advertisement nga inyong makita sa TV, madungog sa radyo, mabasa sa newspaper ug sa social media sama sa Facebook, Twitter, Instagram ug uban pa, pulos sila niduso og kampanya batok sa kurapsiyon.

Silang tanan pulos niangkon sa kalapad ug sa nakagamot na nga kultura sa kurapsiyon diha sa sistema sa panggobiyerno.

Apan ang akong pangutana alang sa tanang politiko nga magpapili: Ngano nga hangtod karon wala may kausaban? Ngano nga mas nigrabe pa ug nakasukad na diha sa mga posisyon ug gahum nga inyong gihuptan?

Wala’y bisan usa niining mga kandidato karon gikan sa pagkapresidente sa nasud, hangtod na sa pagkakonsehal sa lungsod, nga bag-o. Silang tanan pulos may kasinatian sa panggobiyerno.

Ang uban bag-o pa, apan kadaghanan nila pulos nangaraan. Gani henerasyon na sila. Kun ilang giangkon ang nagkagrabe nga kultura sa kurapsiyon diha sa panggobiyerno, dili ba sila ra man ang naghupot sa gahum?

Kun mangampanya ka batok sa kurapsiyon, kinsa may imong target?

Salikwaot para nako nga sabton ang sinseridad sa kadaghanan sa mga politiko nga mangampanya batok sa kurapsiyon kun sila mismo gipasanginlan, bisan kun wala pa hingpit mapamatud-i nga sad-an sa kasong pagpangawkaw ug pangurakot.

Apan ang mas makapalibog nako mao ang kamatuoran nga kitang mga botante mopili gihapon sa mga politiko nga bisan kun nakonbikto na sa pagpangawat ug pangurakot, ato gihapon silang gipili ug gani nahibalik pa sa pwesto.

Usa sa labing klaro nga ehemplo mao si kanhi presidente Joseph Estrada. Nakonbikto sa kasong plunder. Napalagpot sa katungdanan. Apan human gipasaylo ni kanhi presidente Gloria Macapagal Arroyo, karon nakabalik  sa puwesto isip mayor sa Manila City.

Apan ang mas grabe, hapit pa siya mapili pag-usab pagka-presidente. Maayo na lang kay nidaog si presidente Aquino. Ang laing ehemplo mao si kanhi presidente Gloria Macapagal Arroyo.

Bisan kun hangtod karon gipaubos pa sa hospital arrest sa kasong plunder, napili ug magpapili na usab karong Mayo 9 alang sa iyang katapusang termino pagka-kongresista sa Pampanga.

Unsa ba gyu’y atong klarong pagsabot mahitungod sa kurapsiyon? Kun atong basehan ang Webster's Dictionary, Merriam Dictionary o kaha ang Wikipedia ug uban pa, pasabton kita nga ang kurapsiyon mao ang paghimo og mga buhat sa pagpamakak o pagkawala’y batasan ug wala’y pagtahod sa usa ka tawo, nga gisaligan sa usa ka katungdanan o gahum,  tungod ug alang sa iyang kaugalingong kabulahanan.

Apan angay natong hinumdoman nga dili ra ang mga tawo nga dunay gahum ug dagkong posisyon sa gobiyerno o sa bisan unsang organisasyon ang makahimo niini. Kitang tanan may kapasidad nga mangurakot sanglit kabahin kini sa atong pagkatawo. Dili man kini matangtang apan mahimong kapugngan.