Nasubrahan ra si Digong!

"What you see, is what you get."

Ingon niini si Mayor Rodrigo Duterte kinsa walay pugong-pugong sa iyang ipamulong. Kun unsa ang iyang mahuna-hunaan ug makit-an, mao usab ang iyang buhaton. Walay lipud-lipod ug prangka nga pagka tawo. Gani sa pagsalmot na ni Duterte sa 2016 presidential race, siya mismo ang miuna sa pagladlad sa mga isyu nga iyang gilambigitan nga siguradong gamiton sa iyang mga kaatbang batok kaniya.

Lakip niini ang pagkalambigit niya sa lainlaing mga babaye gawas sa iyang asawa ug ang pagpabanaw sa dugo sa mga kriminal didto sa dakbayan sa Davao diin siya maoy mayor. Ang iyang pagka straightforward nga manulti, walay kaplastikan nga kinaiya ug ang kaisog maoy nagustohan sa mga tawo nga napul-an na sa tradisyonal nga pamaagi sa mga politiko nga magpa "good image effect" aron lang makuha ang simpatiya sa mga botante.

Apan exactly opposite kaayo si Digong sanglit ang iyang gigamit karon nga technique mao man ang iyang mga baho. Kini ang nakalahi ni Duterte sa uban nga mga politiko kinsa maayo kaayo motago sa ilang mga baho. Apan nasubrahan ra si Digong sa iyang prinsipyo nga walay gi-santo o gitahod nunot sa pagpamalikas nga giluwatan niya batok ni Pope Francis.

Gumikan sa kahasol nga nahiaguman ni Duterte sa grabeng trapik atol sa Papal visit kaniadto, matud niya nga iya unta tawagan ang Santo Papa ug ingnan nga "Pope, p_ _ _  ina ka, umuwi ka na at huwag nang bumalik dito." Pananglit kumedya man ugaling kini sa usa ka presidential aspirant aron lang ipakita kun unsa siya ka “astig” nan, dili gyud maayo. Unsa man tawon ang sala sa Santo Papa nga kun siya lang gani seguro ang pabut-on, maglakaw ra kini ug hangpon ang tanang mga tawo.

Apan dili kini mahimo gumikan sa higpit nga siguridad nga gipatuman. Mas maayo siguro nga ang gibombardiyo sa pagpamalikas ni Duterte mao ang mga kriminal ug mga kaatbang sa politika, nungka ang Santo Papa nga naghatag og dako nga paglaum sa katawhan, ilabi na kadtong mga nabiktima sa bagyong Yolanda.

Gawas pa dili politiko o kriminal si Pope Francis nga apilon sa paghisgot ug pag-atake ni Duterte. Ang tawo nga naghimo ug mga dautan maoy angayan nga kondenahon apan ang tawo nga nagsabwag sa katarong ug paglaum angayan nga respetohon!