Ang popularidad ni Duterte

Kalit nisulbong ang popularidad ni Davao City Mayor Rodrigo Duterte sa labing bag-ong survey sa Pulse Asia nga gipahigayon niadtong Nobiyembre 11 ngadto sa 12 sa wala pa siya modeklarar nga modagan pagka-presidente.

Sa National Capital Region (NCR) gihimo ang survey sa 300 ka respondents. Sa pangutana kun mag-election karong adlawa kinsa ang imong pilion? Ang mga gipilian mao sila si Duterte, Senador Grace Poe, bise-presidente Jejomar Binay, kanhi DILG Secretary Mar Roxas ug Senador Miriam Defensor-Santiago.

Ang resulta, si Duterte nakakuha og 34% nga botos. Gisundan siya ni Poe nga may 26%. Ikatulo na lang si Binay nga may 22%, ika-upat si Mar Roxas nga may 11% ug 7% kang Santiago.

Sa tanang respondents sa NCR gikan sa mga dato, middle class ug pobreng mga tawo, pulos naglabaw si Duterte. Sa mga dato nga gipangutana, nakakuha si Duterte og 38 % nga botos, 34% sa middle class ug 31% sa mga pobre.

Si Poe, 19% sa mga datu nipili niya, 28% sa middle class ug  27% sa mga pobre. Si Binay 14% sa mga dato, 21% sa middle class, 32% sa mga pobre.  Si Roxas may 13% sa mga dato,12%  sa middle class ug 5% sa mga pobre. Si Santiago 15% sa mga dato, 5% middle class ug 5% sa mga pobre.

Kun survey ang basehan, aprobado sa tanang hut-ong sa katilingban ang kandidatura ni Duterte. Samtang si Poe nga nagsunod kaniya dili tantong humot sa mga dato nga botante, ilabi na sila si Binay, Roxas ug Santiago.

Apan dili angay kompyansaan si Binay tungod kay bisan kun ikatulo na lang siya sa uwahi nga survey, siya usab ang adunay labing taas nga porsiyento gikan sa mga kabus nga botante uban sa iyang 32% nga botos.

Angay hinumduman nga ang kinabag-an sa mga botante anaa sa mga kabus. Hinoon gamay ra kaayo ang labaw ni Binay sa kang Duterte nga 31%. Gitataw usab sa research director sa Pulse Asia nga si Anna Maria Tabunda nga aduna pay margin of error ang resulta sa survey ug dili pa gani makonsiderar nga naapsan na ni Duterte ang nag-una sa mga survey nga si Poe.

Apan kun nakahinumdom mo sa 2010 presidential elections nga samtang nag-ukon-ukon pa kaniadto si presidente Aquino nga modagan, si kanhi senador Manny Villar maoy consistent nga number one sa mga survey.

Apan human sa retreat ni PNoy ug sa wala pa ang deadline sa filing sa COC, wala na igkita sa survey si Villar. Gani si kanhi presidente Joseph Estrada pa ang nagsunod ni Presidente Aquino.

Posible kaha nga mahisama ang sitwasyon ni Duterte kang PNoy? Mas nisibaw ang kahigwaos sa mga Filipino nga makaangkon og isog nga lider nga makapitol sa mga badlungon sa pagsulbong ni Duterte.