Positive attitude

Sa ato na nga gihisgutan dinhi, giingon nga kun buot kita nga madugay-dugay pa ning temporaryo nga kalibutan, kinahanglan kita nga mo-adopt og positive attitude.

Tinuod, ug usa sa makatabang aron makapa-adopt kita og positive attitude, mao ang mga kahigayonan ug kahimanan nga makatagad ug makaatiman sa atong panglawas.

Among others, ang RA 9994 nagbuot (unta) pagtukod og mga geriatric wards sa mga hospital sa kagamhanan. Ambot kun may mituman ba niini.

Dinhi sa ato, kutob lang kita pagpapasar og ordinansa ug tungod kay ang atong mga balaod dinhi sa atong nasud, “are mere suggestions,” sumala sa napanid-an sa usa ka langyaw’ng periodista, wa pa gyud matukod ang gikinahanglan unta kaayo nga geriatric ward. Ambot kaha sa ubang dapit sa nasud.

Didto hinoon sa kaulohan, ang Makati Medical Center adunay Optimal Aging Center diin matud pa, “where age is just a number.”

Ang Center motabang sa mga seniors “to age gracefully and successfully.” Nindot no? Kun duna ta niini dinhi sa atong siyudad?

Ang Makati Medical Center usa ka private hospital ug ang Ospital ng Makati, samtang wa sab tingali sila’y geriatric ward, apan, daghan sila og mga services alang sa mga senior citizens, sama sa regular nga visit sa ilang mga doctor ug nurses sa mga masakiton nga senior citizens.

Ang ilang mga doctor, mga specialists, ilabi na sa geriatric syndromes, cardiology, geriatric psychiatry, ophthalmology, ug physical medicine ug rehabilitation. May mga nutritionists, physical ug operational therapists, Sa ato pa, kompleto nga panambal ug pag-atiman sa mga senior citizens.

Sa ilang Adult Activity Center, ang mga pasyente, gumikan sa nagkalainlaing kalihokan ug kalingawan, makalimot na sa ilang mga edad, sa ilang mga gibati nga sakit, ug sa ilang mga problema ug kagul-anan.

Kini gumikan sa socializing, regular nga exercise, ballroom dancing, painting, social ug communications activities pag-improve sa social wellbeing sa mga senior citizens, ug cognitive stimulating activities aron ma-exercise ang utok.

Usa ka nagpanuigon na og 78, hanas sa painting. Ang uban, social na kaayo, ganahan na nga magsuroysuroy, busy na ug nawala ang tapul, nagpangita na og unsa ang buhaton, nakakita na og bag-ong barkada, maayo man nga mo-piano … epekto sa ilang pagpa-rehabilitate sa Makati Med.

Ug alang sa indigent nga mga elderly, regular ang ilang pag-medical mission, ug mga forum aron pag-edukar sa mga senior citizens unsaon pag-atiman sa ilang kaugalingon, ilabi na bahin sa panglawas.

Kining tanan, makapamugna og positive attitude kanatong mga senior citizens. Sana mayroon ito dito sa atin.