Kinsa ang makasunod sa pension sa amahan?

Dear Atty. Divine,

Ako si Sabrina, 21-anyos ug gusto lang ko mangayo og advice kabahin sa SSS sa akong papa. May kaipon ang akong papa karon apan dili kini sila kasal. Akong nabantayan nga si papa nagsunod-sunod lang sa gusto sa iyang kaipon hinungdan nga mibalhin na lang ko og puyo kay daug-daugon ko sa iyang kapuyo. Ang akong papa gikatakda na nga mo-file og retirement alang sa iyang pension sa SSS. Ang akong gikabalak-an nga kun makuha na sa akong papa ang iyang pension sa SSS, ang iyang katipon maoy magbuot ug hayan dili na mi mahatagan nga iyang mga anak. Nahadlok sad mi nga kun wala na’y kuwarta ang akong papa ug mahurot na ang iyang pension biyaan lang unya siya sa iyang babaye. Unsa may angayan nako nga buhaton? Kun dunay mahitabo sa akong papa, makadawat ba mi nga mga anak sa iyang pension?

Dear Sabrina,

Kun ang imong papa nahigugma anang iyang kapuyo, wa g’yuy mahimo ang mga anak niana kay masuko gyud na kun hilabtan ninyo ang iyang lovelife. Samtang kalabot sa pagdawat unya sa pension sa imong papa sa SSS, dili gyud mo makapanghilabot kaniya kun unsaon niya paggasto ang iyang kwarta. Dili siya obligado nga mohatag kaninyong mga anak ilabi na kun kamo anaa na sa hustong edad. Gawas lang kun ang uban kaninyo nagtungha pa kay ubos sa balaod obligado gyud ang amahan nga mosuporta sa panginahanglan sa anak lakip na sa iyang pagtungha. Ang maayong buhaton nimo mao lang ang pagpakigsulti sa imong amahan nga kun makadawat na siya sa iyang pension, dili kini ihurot og gasto aron dunay magamit kun masakit ug sa panahon sa emerhensiya. Kun ugaling dunay mahitabo sa imong papa, kamong mga anak dili sab mo makasunod sa iyang pension sa SSS tungod kay anaa na man kamo sa hustong edad. Basi sa balaod, ang surviving spouse o kapikas sa namatay nga pensioner sa SSS lang ang makadawat og pension kun siya dependent sa namatay ug ang mga anak nga menor de edad pa ug dependent sa namatay nga SSS member mao ra sab ang makadawat og pension sa SSS.—    Atty. Divine

* * *

Alang sa inyong pangutana, ipadala lang sa Legal Corner, Banat News, V. Gullas St., Cebu City or email sa [email protected] ug akong tubagon ang inyong pangutana pinaagi sa akong column.