Hata-hata ni Duterte
Sa makadaghan nga higayon nagsige sa pagpangulipas si Davao City mayor Rodrigo Duterte nga siya modagan pagka-presidente sa election sunod tuig. 70 anyos na si Mayor Duterte.
Sa kasaysayan sa mga nahimong presidente sa nasud kun modaug si Duterte, siya ang labing tiguwang nga mamahimong presidente. Apan sa mga modagan pagka-presidente sunod tuig may mas maguwang pa ni Duterte, si bise-presidente Jejomar Binay nga 73 anyos na.
Apan ang pangutana mao, desidido ba gyud nga modagan si Duterte sa pagka-presidente?, o hata-hata ra gihapon ang iyang deklarasyon atol sa usa ka salosalo nga iyang gitambongan didto sa Dasmarinas, Cavite?
Taphaw ra para nako ang rason ni Duterte nga nadismaya siya sa desisyon sa Senate Electoral Tribunal nga nag-ila ni Senador Grace Poe nga usa ka natural born Filipino. Una sa tanan ang desisyon sa SET dili pa pinal. May Korte Suprema pa nga may mas labaw nga gahum sa hingpit nga paghukom kun natural born Filipino o dili si senador Grace Poe.
Sa iyang pamahayag nga Amerikano si Poe, tinuod nahimo siyang usa ka American citizen tungod sa iyang pagka-naturalized nunot sa pagpetisyon sa iyang bana nga usa ka dual citizen. Apan niadtong 2006 gitalikdan ni Poe iyang pagka-naturalized American citizen ug nibalik sa iyang pagka Filipino.
Gustong magpalahi si Duterte sa iyang campaign strategy. Mura'g gustong i-aplay ni Duterte ang berso sa bibliya nga "kinsa kadtong magpa-ulahi mahiuna ug kadtong mahiuna maulahi" nunot sa iyang pagdasig sa mga nitambong sa okasyon didto sa Dasmariñas nga siyay ipauwahi sa pagkonsiderar sa tanang pilionon pagka-presidente.
Gusto niyang ipauna sila si LP standard bearer Mar Roxas nga iyang gihulagway nga competent. Si bise-presidente Jejomar Binay nga may integridad ug makahimo sa pagpadagan sa nasud sama sa estilo ni anhing Singapore Prime Minister Lee Kuan Yew. Si Senador Miriam Defensor Santiago nga matud niya intelihente.
Maong nabawo intawon ang nagpakisi unta niyang mga supporter sa Sugbo niadtong Domingo nga naghuwat niya sa UP grounds sa Lahug, Cebu City nga makadungog personal ug direkta sa iyang baba ang mga pulong nga modagan ko pagka-presidente.
Kun pananglitan sayo nga mahukman sa Korte Suprema ang isyu sa citizenship ni Senador Grace Poe ug matuis ang desisyon sa SET, unsa na usab kaha ang desisyon ni Duterte?
Siguro mao na ang labing balido nga rason ni Duterte sa pagdeklarar nga kutob ra siya sa Davao City. Nga mas nagkinahanglan niya ang Davao City kaysa tibuok Pilipinas tungod kay aduna mas takos pa kaniya nga modumala sa nasud.
- Latest