Ayaw pas-ana ang problema

Tungod kay kita aduna pay kinabuhi, ang mga problema maoy kusog sa atong pagpakabuhi niini'ng kalibutana. Dili gayud kita kalikay niini, kay lagi buot nato nga dili mahasol, sa kahadlok makahimo kini og babag, sa mga pangandoy. Basi'g mabug-atan, maong iya ning buhian, sa ingon wa siya'y tulubagon sa pagsulbad. Apan sama ra sab, gibuhian ang kusog nga magamit ni's pakigbisog.

Ang pag-angkon og mga problema, angay nga ikalipay, kay hagit kini nga imong sagubangon, aron ikapaila kun unsa kita kalig-on. Lamang nataligam-an ang kahulugan ini, nga maoy unang rekisitos nga modaug kang malampuson. Busa, ayaw pagduhaduha sa imong katakos sa pakigharong ini nga maisogon.

Ang mga problema, kabahin kini sa pagsulay nga ato'ng tagamtamon ang kapait ini, katumbas sa katam-is nga ganti sa paglahutay nga nagmadaugon. Dili ni sayon buhaton, apan di angay mawad-an sa paglaum, kay may giya kang imong tamdan, sa pagseguro nga dili ka mapukan sa kabug-at sa mga problema.

Magkat-on, kun may moabot nga sunod-sunod nga problema, ayaw kini pas-ana. Ikwentas ni sa imong dughan, nga malipayon. Igo lang nimo tutokan, nga maghatag gahum sa panghunahuna, nga anamon himuong bulawanong hiyas sa kabililhon sa imong pagkatawo. Mahimo kang sumbanan sa kahanas, nga gibaid mo pag-ayo ang kahait sa salabutan, aron pagtubag sa mga problema.

Usahay, kay duna may limitasyon ang katakos sa atong pagkatawo, di sab kalikayan nga maugtas kita sa kagrabe sa problema sa kinabuhi. Mura'g wa na kita'y masil-ing nga kahayag, ingon sa gisanapan na's kangiob ang paglaum.

Apan ang kahitas-an, nga maoy tinubdan sa mga panginahanglan , dili Siya motalikod, nakaandam motabang, pinaagi sa kinasingkasing natong pag-ampo.