‘Impressive’ nga Bicolana

Giulan og mga pagsaway ang pamilyang Binay human migawas sa Facebook ang reaksyon ni Kongresista Abigail Binay sa pagka-dismiss sa iyang igsuong si suspendidong Mayor Junjun Binay. Matud ni Abigail nga kun dili na makadagan si Junjun, siya ang modagan og mayor sa Makati ug iyang bana ang mag-kongresista sa ilang distrito.

Nagtuo na lang g’yud si Abigail nga ingon niana na ka-importante ang pamilyang Binay. Bisan sa kapakyas sa iyang amahan nga si Bise Presidente Jejomar Binay pag-esplikar sa miburot nilang kabtangan ug ang nagpusot-pusot nga mga kaso’ng kurapsyon sa Makati.

Usa pa, dili intawon korporasyon ang lokal nga kagamhanan sa Makati nga ang nakarehistro nga tag-iya didto sa Securities and Exchange Commission mao ang mga Binay. Nagtuo si Abigail nga mahimong "family corporation” ang politika diin sila nagpaka-adunahan.

Sa Facebook gihapon, lahi-lahi ang reaksyon sa pagdagan ni Bongbong Marcos isip bise presidente. Nabuhi og samot ang mga pagsaway sa martial law, paghisgot sa human rights violation sa pamilya sa iyang amahan nga si diktador Ferdinand Marcos, ug ang padayong pagpangita sa nasud sa mga “Marcos ill-gotten wealth.”

Ang “impressive” og reaksiyon diha sa Facebook mao ang Bicolana nga si Leni Robredo. Daghang nakadayeg sa tandem ni Mar Roxas sa pagkataas sa “level” sa iyang mga pamahayag.

Gani, gisuwayan siya og komparar sa presidentiable nga si Grace Poe, nga bag-o pa gani sa natad sa politika, nagpakita na sa iyang pagka-trapo (traditional politician). Dili kini ikahibulong kay kinsa ang naa sa iyang luyo? Dili ba ang mapahimuslanon ug lawom og interes nga si Chiz Escudero?

Ang wala pay klaro mao si Mayor Digong Duterte. Nangayo pa siya hangtud ugma aron modesisyon. Modagan ba g’yud?

Sa Cebu City, nag-una og proklamar ang Team Rama niadtong Biyernes ug misunod ang BOPK sa miaging Lunes. Kasaligang tinubdan nag-ingon nga may mga lider si Mike nga namiya tungod sa padayon niyang pagpilit ngadto kang Binay. Ang mga lider niya nahibulong ngano nga siya lang ug laing usa ka mayor ang lider ni Binay dinhi sa Sugbo.

Posible pa nga mag-atubang og kaso si Mike tungod sa pagpangulo og rally sa mga empleyado sa City Hall batok sa konseho tungod sa pagpugong sa P2.8 bilyones nga supplemental budget, bisan tingtrabaho.  Mao kini nakanindot kay dili man “stamp pad council” ang konseho karon mao nga dili mahatag ang gusto ni Mike.

Sa Mandaue, kay mipugos man g’yud si Luigi Quisumbing pagdagan og mayor bisan may ikatulo pa siyang termino, magpaabot na lang siya nga koprason iyang kuwarta. Samtang si Lolypop Ouano-Dizon dugay nang nakagamot sa mga sitio, si Luigi hugawan pa nga mosuot ilabi na sa mga pobre ug slum area sa Mandaue. Mag-unsa ang kuwarta kun layo ka sa mga tawo?