EDITORYAL - Tukma nga pagpili
Dalayegon kaayo kadtong mga tawo nga nagtinguha pagserbisyo sa publiko pinaagi sa paglansar sa lainlaing mga puwesto sa kagamhanan.
Apan dili ikalimod nga may mga tawo ‘sab nga gusto lang nga mapili sa mga elective positions sa kagamhanan isip ilang panginabuhian ug dili seryoso sa pag-alagad sa katawhan nga ilang gisaaran nga serbisyohan.
Dili ikalimod nga daghang mga opisyal nga kun mapili na sila sa katungdanan sa kagamhanan nga ilang gitinguha, lisud na kaayo nimo sila nga makita sa tagsa-tagsa nila ka opisina.
Kun imo sila nga masugatan, taas na kaayo’g agtang nga dili na motagad, usa ka batasan nga sukwahi sa ilang gipakita atol sa pagpangampanya.
Mao nga ang mga botante kinahanglan gayud nga mohashas pag-ayo sa mga kandidato nga gusto’ng molingkod sa katungdanan sa kagamhanan sa walay pagtan-aw kun asa sila nga politikanhong grupo nasakop.
Angay’ng tan-awon sa mga botante kun ang usa ka kandidato nga gusto magpapili isip gobernador o mayor may katakus ba nga mahimo’ng manager sa usa ka Local Government Unit (LGU).
Kun ang kandidato gusto nga mapili isip kongresista, sakop sa provincial board ug sa mga konseho, kinahanglan nga may katakus sila nga makiglantugi ug mopasabot sa usa ka isyu atol sa ilang sesyon. Kini aron nga kamenosan na ang mga sakop sa “Silent committee” nga walay laing trabaho atol sa mga sesyon gawas sa pagsige’g irag-irag sa ilang mga lingkoranan.
Likayan na g’yud unta sa mga botante ang pagboto tungod lang kay ang mao nga kandidato anaa milansar sa politikanhong grupo nga ilang gilabanan.
- Latest