EDITORYAL - Problema sa basura

Ang kanhi department head sa Cebu City Hall nga karon gusto nga magpapili pagka konsehal mibutyag nga kuwang ang kampanya sa siyudad aron unta nga gamay ra nga mga basura ang malabay ngadto sa pribado nga landfil sa Consolacion.

Gibutyag ni Randy Navarro, kanhi pangulo sa Cebu City Environment and Natural Resources Office (CCENRO), nga ang nag-unang rason nga mipahawa siya sa serbisyo sa City Hall mao nga wala paminawa ni Mayor Michael Rama ang maayo niya nga sugyot.

Gusto unta ni Navarro nga ang mga sakop sa Cebu City Environmental and Sanitation Enforcement Team (Ceset) mohingusog sa pag-inspection sa kabalayan dinhi sa dakbayan aron sutaon kun gituman ba nila ang lagda nga didto pa sa ilang panimalay buwag-buwagon na ang mga basura.

Matud ni Navarro nga kun gituman pa sa Ceset ang iyang sugyot, ingon man gimandoan ni Mayor Rama ang hingtungdang hepe sa Ceset aron ipatuman ang lagda sa balaod, menos ra unta ang mga basura nga ilabay ngadto sa private landfil sa Consolacion.

Ang kapin sa P50 milyones nga gigahin isip bayad sa paglabay’g basura sa Consolacion nga tag P700 kada tonelada, nahurot na kaniadtong Agosto.

Dili g’yud unta angay’ng ibaliwala lang ni Mayor Rama ang maayong sugyot ni Navarro tungod kay gitumong man kini alang sa kalamboan sa panerbisyo sa dakbayan.

Kun tinud-on g’yud ang pagpatuman sa balaod nga gilatid sa Republic Act 9003, and Ecological Solid Waste Management Act, sigurado nga ang tanan mapugos sa pagtuman aron nga dili sila makamulta.

Apan tungod kay lugak man ang implementasyon sa balaod mao nga makita diha sa gipanglabay nga mga basura nga wala gayud tumana sa katawhan ang pagbahig sa mga basura.

Wala usab tumana sa dakbayan ang “No Segregation, No Collection.”