Susiha asa ka epektibo

Aduna'y panultihon nga matud pa, "Dili nato paabuton ang ugma kun unsa'y mahimo nato karon, kay wala kita masayud kun ang adlaw mosubang pa."

Og aduna pa'y laing sanglitanan nga nag-ingon, "Nga aduna'y uban nga kontento na sa sulod sa baso nga may tunga sa tubig, apan ang uban nakita nga kini kulang pa's katunga ang bakante nga kasudlan pa sa baso."

Kini mao'y kamatuoran nga ang kinabuhi, managlahi ang atong mga panan-aw o pangaspas, nga ang mga desisyon himuon, gipasikad sa unsa'y maabot sa panghunahuna. Nga usahay mogawas nga way kapuslanan kay wa'y gisandigan nga isustener ang tukma'ng rason o hinungdan nga maghatag katin-awan.

Latagaw ingon sa namasin kanunay nga wa'y kaseguroan ang kaugalingon, sa iyang katakos sa paghimo og mabungahon nga ekspresyon sa realidad. Tungod kay wa niya masusi ang kaugalingon, kun asa siya mahimo'ng labing epektibo nga kapuslan ang iyang pagkatawo. Aron maugmad ang nakatago'ng hiyas o abilidad nga kapasidunggan ang kalidad sa pakiglambigit sa isigkatawo.

Busa ato gyud pangitaon, asa kita labing kapuslan o makahatag sa uban og epektibo nga desisyon nga magbunga og talagsaon nga kahimoan sa kinabuhi.

Tungod ini, tinguhaon nga nakapukos ka ini, kun imo na'ng nakaplagan nga asa ka labing bantug o eksperto, adto mo kini idedikar aron ikaw ilang respetuhan.

Ibayaw ka'ng pasidunggan nga himuon ka'ng sumbanan sa imong pagkatawo.

Sukwahe niadtong uban nga igo na lang sa kasina, kay wa damha nga daku ang natampo mo'ng kaayohan sa katilingban.

Kita'ng tanan makahimo baya niini, kulang lang ta sa pag-ugmad sa tingusbawan, kontento na lang bisan may kulang, gipasagdan lang hangtud naluya ang paglaum. Nga unta makahimo pa man nga mapun-an ang kakulangan sa iyang kinabuhi, pinaagi sa paglahutay.