Bag-ong distrito

Ambot kun unsay benepisyo ang mapaabot sa katawhan sa lalawigan sa Sugbo niining bag-ong naumol nga ikapito nga distrito. Hinuon, sa laing bahin, magdugang kini og mga bag-ong opisyales alang sa Kongreso ug sa Provincial Board.

Sa niaging mga adlaw, pormal na nga mi-take effect ang balaud nga nagkulit sa bag-ong distrito sa Sugbo. Kini human usab giaprobahan sa Commission on Elections ang bag-o nga mga posisyon sa Kongreso ug PB, nga adunay duha ka puwesto.

Nagpasabot kini nga open na usab kining maong mga posisyon alang niadtong buot mokandidato sa piniliay sa Mayo sa sunod tuig. Ug nangandam na gani karon kadtong buot modagan sa maong mga posisyon.

Kahinumdoman nga gikan kining 7th district sa ikaduha nga distrito. Tungod sa kadako sa maong lugar nga naglangkob sa 15 ka lungsod, adunay gipasaka nga lakang didto sa Ubos Balauranan paghiwa niini. Ug mao na kini ang resulta karon.

Tungod niining maong kalamboan, nag-iyahay na og positioning ang mga pulitiko sa bag-ong distrito alang sa sunod nga eleksiyon. Sa kumbati alang sa Kongreso, adunay duha ka sakop sa inilang pamilya sa lalawigan ang gikatahong mag-atbang.

Usa kanila mao si kanhi Cebu third district Representative Pablo John Garcia, kinsa rehistrado sa lungsod sa Dumanjug. Iyang ikasagbang si Provincial Board Member John Peter Calderon nga rehistrado sa lungsod sa Ginatilan.

Hinuon ang katukoran sa bag-ong distrito nagpasabot usab nga mapun-an og usa ka representante sa Ubos Balauranan ang lalawigan sa Sugbo. Ug, siyempre, dako usab kini og ikatabang sa mga molupyo sa maong distrito tungod kay magdala man usab kini og mga proyekto.

Apan ang problema mao nga wala nay dakong pundo ang kagamhanan alang sa mga pork barrel sa mga magbabalud. Gani, nag-iyahay na’g kamas ang mga kongresista aron pagsungkit og pundo alang sa ilang mga proyekto.

Bisan pa man niini, ang dakong insentibo nga makuha sa mga Sugboanon gikan sa pagkahimugso sa bag-ong distrito mao nga mas matutokan sa bag-ong kongresman kadtong mga lugar nga kulang sa pagtagad kaniadto tungod lagi sa kadako sa segundo distrito.