Bag-ong mga bombero

Nanumpa na sa katungdanan ang 75 ka bag-ong bombero dinhi sa Central Visayas kagahapon. Ipang-apud-apod unya kining maong mga bag-ong bombero sa tibuok rehiyon-7, labi na sa mga fire stations nga kuwang og fire personnel.

Paspas kaayo ang recruitment karong panahona sa Bureau of Fire Protection (BFP)-7 nga gipangulohan ni Senior Superintendent Esmael Codilla, ang acting regional director. Gani nanawat na pud kami og aplikante alang sa 100 ka bakante nga posisyon. Kadtong buot mo-apply, ari lang kamo sa among rehiyonal nga buhatan.

* * *

Sa pikas bahin, pormal na nga gimontar ang higante nga Christmas tree dinhi sa dakbayan diha sa Fuente Osmeña circle ug naghatag na kini og sinyales nga nagkaduol na gayud ang Pasko.

Makita nato ang daghang mga establisemento nga nagbutang na pud og mga dayan-dayan alang sa Pasko. Sa makausa pa, ang inyong kabomberohan moawhag sa publiko nga likayan ang pagpalit o paggamit nianang mga substandard nga series lights aron hingpit kita nga makalikay sa sunog. Unsa may timailhan nga ang maong series lights substandard? Una, barato kaayo nga halos na lang ipanghatag. Ikaduha, wala kini marka nga ICC kon Import Commodity Clearance.

Nagpasabot kini nga ang produkto wala moagi sa makuti nga quality control. Ikatulo, nigpis kaayo ang mga wire nga gigamit ug dali kini nga moinit.

Kun nakapalit na kamo niini, mas maayo siguro nga dili na lang ninyo kini gamiton ug ilisan ninyo og bag-o, bahala na lang og mahal.

Ayaw ibutang sa dakong risgo sa sunog ang atong pamilya pinaagi sa paggamit sa maong mga substandard nga series lights. Bisan pa gani og nakapalit kita og maayong kalidad nga series lights kinahanglan gihapon nga may disiplina kita sa paggamit niini ug dili angayang pabuntagan.

Pasigaha lang ninyo kini og 3 ngadto sa 4 ka oras aron sigurado kita nga luwas sa sunog.