Mao ra gihapong nawnga

Sa bag-o lang gipagawas nga resulta sa Pulse Asia survey hapit tanang pangalan nga nahimutang sa listahan sa posible nga modaug sa pagka senador mao ra gihapon ang mga ngalan ug mga nawong.

Aduna pud hinuoy naapil nga mga kongresista pero mao ra gihapon, nangaraan na sa politika. Gawas nila, naapil pud ang mga igsuon, anak ug mga kaliwat.

Mao nga akong napanglantawan nga kun sila ra gihapon ang modaug, mao ra gihapon ang dagan sa Senado ug wala’y mahimo nga kausaban.

Wala maapil sa talaan sa survey ang mga naila nato nga mga ligdong, adunay mga prinsipyo ug katakos sa pagka senador nga sama ang kalidad nilang Jovito Salonga, Lorenzo Tañada, Rene Saguisag, W. Diokno ug uban pa.

Hain na man ang de prinsipyo nga si konsehal JC delos Reyes ug ang bisaya nga environmentalist nga si Nicanor Perlas?

Asa na man ang abogado sa mga whistleblower sa pork barrel scam nga si Levi Baligod nga maoy responsable sa pagpapriso nila ni Senador Jingoy Estrada, Bong Revilla Jr., Juan Ponce Enrile ug sa giingong pork barrel Queen nga si Janet Lim Napoles?

Si Atty. Levi Baligod ni sakripisyo sa iyang kinabuhi aron mataral sa hukmanan, mapapriso ug maimbestigahan ang mga Senador, mga kongresista ingon man mga taga Commission on Audit mismo kinsa nagkunsabo ug nakigkunsabo sa mga responsable sa pagwaldas sa salapi sa katawhan. Asa na man siya?

Sila ang angayan unta nato nga makita sa listahan sa mga survey nga posible nga modaug pero wala. Ngano man? Tungod kay dili kaayo sila sikat?

Gipatigbabaw gihapon nato ang politika nga gibase sa personalidad ug dili sa prinsipyo ug plata porma.

Kun si Atty. Levi Baligod magpapili pagka senador bisan wala ko makaila niya sa personal usa siya sa akong botaran kay nakaila ko sa iyang mga binuhatan ug nahimo na para sa katawhan.