EDITORYAL – Mga tikasan
Adunay kamandoan ang Land Transportation Franchising and Regulatory Board (LTFRB) ngadto sa mga drayber og taxi nga ang plete sa ilang mga pasahero ibanan nila og P10.
Nagpasabot kini nga kun P100 ang pletehan sa pasahero sa pagsakay niini og taxi, P90 ra ang iyang kolektahon nga bayad base sa kamandoan sa LTFRB.
Apan pagka karon midagsang ang mga tikasan nga drayber sa taxi nga dili na moiban og P10 sa pletehan gawas lang kun ang hingtungdang pasahero modemanda g’yud niini.
Dili maayo ang gihimo sa mao nga mga drayber. Sa ilang gihimo maisip sila nga mga tikasan kay sagad kuwang man ang ilang isukli sa mga pasahero.
Ang presyo sa gasolina pagka karon gihulagway nga mas barato ra kun itandi sa kantidad kaniadto diha nga gipausbawan ang flagdown rates ug ang matag patak sa metrohan.
Kinahanglan nga ang katawhan moreklamo gayud kun dili ibanan sa drayber og P10 ang mipatak diha sa metro.
Daghan sa mga sumasakay dili ganahan nga moreklamo sa LTFRB tungod sa kalangan ug kahasol sa pagtambong sa mga hearing.
Kun adunay 100 ka pasahero nga makasakay sa taxi sa 24 oras niini nga paglibut-libot sa Metro Cebu, nagpasabot nga hayahay kaayo ang usa ka libo ka pesos nga dugang ganansya sa mga drayber.
Nindot g’yud unta nga ang LTFRB mohimo’g kampanya ug sakyan nila ang mga taxi aron sila mismo ang makasakop sa mga drayber nga tikasan.
- Latest