Pasko na g’yud hapit

Dali ra gayud ang pagdagan sa panahon kay dili pa lang g’yud dugay nagpakli na usab kita sa atong kalendaryo ug sa wala lang nato damha nga misulod na diay kita sa atong gitawag og "ber" month.

Sama sa naandan basta mosulod na gani kita sa gitawag nato og "ber" month, dili g’yud nako pakyason ang paghatag og pahimangno aron mahimong layo kita sa disgrasya. Nindot kaayo nga pamation ang mga Christmas songs nga mopabugnaw ug ingon sa magpawala sa atong mga suliran.

Aron hingpit nga luwas ug layo sa sunog ang atong pagpaabot ug pagsaulog unya sa Pasko, akong ipaambit ninyo ang pipila ka fire safety tips.

* * *

1.) Daghan na kaayo ang mga series lights nga gibaligya diha sa mga sidewalk nga barato ra g’yud kaayo, hapit na lang ipanghatag. Apan ayaw kamo patental, gamit kamo og mga Christmas lights nga aprobado sa Bureau of Product Standards.

2.) Ayaw kaayo daghana ang mga appliances nga i-plug ninyo sa usa lang ka outlets kay posible nga makamugna kini og grabe kainit sa alambre ug masunog.

3.) Susiha ang mga bag-o ug ang mga daan nga Christmas lights kun mga buak ba o liki ang mga socket.

4.) Gamit kamo og series lights ug Christmas decors nga pang- outdoor kun adto kini ibutang sa gawas sa balay.

5.) Kinahanglan nga ibton g’yud ang plug sa mga Christmas lights kun inyong ilisan ang bulbs.

6.) Ayaw kamo pag-instalar og electrical lights sa usa ka metallic nga Christmas tree, kanang puthaw ba.

7.) Ipalayo gikan sa mga electrical light sources ang carpet, kurtina ug mga butang nga dali nga masunog kay ang tanang mga nagsiga nga suga, bisan unsa pa kini ka gamay, mo-produce gayud og init.

8.) Ayaw paduola ang mga bata sa mga Christmas lights ug uban pa nga electrically operated decorations aron malikayan nga sila mapaso.

9.) Pawnga ang tanang Christmas lights ug ang tanang dikuryente nga dayan-dayan kun mobiya kamo sa balay o kaha sa dayong katulog.