EDITORYAL - Dangpanan

Ang tanang Filipino kinahanglang panalipdan sa gobiyerno tungod kay mao kini ang iyang katungod ug subay sa atong Batakang Balaod.

Apan unsaon man kun ang nakalapas o nagpasagad sa pagpanalipod sa katungod sa mga tawo mao mismo ang mga anaa sa gobiyerno?

Aduna’y Citizen’s Charter nga gipatuman nga diin protektado ang katawhan gikan sa Red Tape ug mga pag-abuso sa mga kawani sa gobiyerno, apan bisan pa niini, may miabuso gihapon niini.

Kay wa lagi masayod asa modangop, adto na lang sa mga social networking sites giwadwad sa katawhan ang ilang kasagmuyo, pagsumbong sa pag-abuso.

Nahimo usab kini nga venue aron dayegon ang mga maayo nga nabuhat sa mga sakop sa gobiyerno. Mao man kini ang labing sayon para kanila aron mapaabot sa mga hingtungdang ahensiya sa gobiyerno ang ilang mga reklamo ug ubang buot ipaabot kanila.

Samtang tuod nakapadayag ang katawhan diha sa social networking sites, dili kini ang husto nga venue aron makorihean ang kasaypanan sa mga gireklamo.

Ang labing maayo nga sumbonganan mao ang mismo nga ahensiya diin nasakop ang nag-abusar nga kawani. Apan aduna’y mas bag-o karon nga mahimo nga kadangpan -- ang bag-ohay lang gilusad nga website, Bantay.Ph.

Dinhi makareklamo ang katawhan online. Mahimo nga isumbong ang partikular nga kawani sa gobiyerno ug ahensiya. Dili angay mahadlok ang moreklamo tungod kay konektado sa Civil Service Commission ang maong website.

Atong tan-awon kun mosaler ba g’yud kini nga website ug kun tinuod ba nga ilang aksyonan ang mga reklamo. Kay kun dili, mas dako nga kauwawan ang mapaabot sa gobiyerno ug sa mga ahente niini kun sa mga social networking sites gihapon modangop ang katawhan.